vendredi 20 février 2009

غزة -دعاء-بورصة

أهوكا أكثر من مليار مسلم يدعيوا لمدة أسبوع كامل لفتح المعابر
معنتها 1300000000 مسلم نضربوهم في 5 صلوات ونزيد نضربهم في 7 أيام نلقاو 4550000000000 دعوة بفتح المعابر بخلاف الصرف ورغم عن ذلك المعابر ماتفتحتش !زعمة شنوة الحكاية؟
أنا نقول :يا إما علاقتنا بال
رب علاقة "كم" بالتالي إلى يجيب أكثر وإلي يدعو أكثر وإلي يدفع أكثر يهز الكل ..كما لعبة كارطة:اللص يهز الكل(تحية إلى لص رقم واحد :-))
وإما علاقتنا
بالرب هي علاقة "كيف" وفي الحالة هذي مانيش فاهم علاش نحددو المدة باسبوع ؟ وكيف تتحل المعابر قبل؟ اش نعملو؟ نوقفو؟ وإلا نزيدو نكملو الأسبوع؟ وكيف ما تتحلش كيما واقع توا،اش نعملو؟ نطفيو الضوء ونكملو الدعاء وإلا نقصو على العملية..؟؟
تي ماو كان يحب يستجيب راهو إستجاب ..الزيادة علاش؟وإلا زعمة أسبوع شوية؟
باهي أنا توا قدامي حالتين:
- عباد كيف اللصقة يشدو ما يسيبوا :أمان.. أمان.. أمان.. أمان..حلنا المعابر
وإلا
-
رب مريض بالنرجسية ويستلذ بالدعاء والتضرع وبآلام الأطفال في غزة وشاد صحيح باش ميحلش المعابر..
إلي نحب نقولو إلي الكثير من الناس علاقتهم بالآلهة ما تبعدش برشة على علاقتهم بعطار الحومة إلي مكردي عندو ، وبعرفهم في العمل.. علاقة تقوم على الخوف و المنفعة المتبادلة:نعطيك دعاء وتعطيني فتح معابر !
نعطي صدقة وتعطيني مكان في الفردوس..
ما نغزرش لجارتي وناخذ حور عين في الجنة...
عندما نتوقف عن جعل الدين مؤسسة بنكية يمكن أن نسثمر فيها اليوم ونجني الثمار غدا خلودا في الجنة..عندما نكف على إعتبار الدين بورصة للاوراق المالية تدفع فيها اليوم عشرة أوراق من فئة 10 حسنات تخذهم غدوة 1000 حسنة.. عندما نكف على طلب الحصول منها على قروض و صكوك غفران عندها فقط يمكن للمسلم أن يتصالح مع ذاته ومع آلهته..وعندها فقط تفتح المعابر بالارادة ودون بيع وشراء
..

8 commentaires:

Dovitch a dit…

برافو آرتي
ههه غلبو عليك بالعوج؟ وسع بالك

Ignescence a dit…

C'est la culture des prières pour ceux qui cherchent les solutions faciles. Au lieux de dire au gens de travailler pour atteindre un certain niveau d'autonomie et acquérir un poid mondial nous permettant d'imposer un bris du blocus, on nous dis priez!! ça me rappelle une anecdote avec un petit cousin, on lui disait quand on demande à dieu un truc lors de la prosternation au moment de la prière, ce voeux est entendu par dieu et réalisé: un jour sa maman l'a surpris, dans sa prière, en train de demander une Play Station 3 à dieu! il a 10 ans, si ça ce n'est pas grave, alors ... mieux vaut se taire :/

ART.ticuler a dit…

هو عوج واسكت؟ أنا من عادتي مانحبش ناقش الأمور الدينية أما راهو ياسر..

ART.ticuler a dit…

هههة بلاي ستايشن 3 هههه ...يلزم صغارنا نعلموهم إلى الدعاء (إذ كان لابد منو) حاجة والعمل والسعي حاجة أخرى أكثر لزوم من الدعاء!

Free Eagle a dit…

المشكلة يا خويا آرت تيكلر مش في الدعاء و لكن في أناس ماكرين يستغلوا في الدين باش يتلاعبوا بعواطف المسلمين البسطاء و مثلا لو نخصصوا أسبوع دعاء لغزة و كتب مكتوب ربي و تغلبت حماس على إسرائيل تكون النتيجة أنو حماس تاخو الشرعية للحكم من غير أي إنتخابات أو أي وسيلة أخرى لأنها ربحت عن طريق نصر رباني يعطيها الحرية باش تعمل أي حاجة في الشعب

ART.ticuler a dit…

المشكل في إلي يعتقد إلي بالدعاء فقط يمكن باش يعمل كل شيء!! شكرا على المرور

abu arabi a dit…

خويا الفنان مسيك بالخير...مانيش باش نحكيلك بالفقهى...وما نحبش الجدال فى الدين بصفة عامة...لكن نحب نطرحلك وجهة نظر بسيطة فى الموضوع..بالنسبة للدعاء..اذا باش نفسروه بالميكانيك..لعباد الكل تعرف اللى هو مايقضيش لمصالح...يعنى الدعاء ما هوش قروصة وفلس وشبيك لبيك...معاك انو برشة عباد تتصورو هكاكة..وهاكم عندهم وجهة نظر مختلفة..اش يعنينا...الدعاء نشوف انو سلاح ذو حدين...اذا حبيت انتى تستعملو بصيفتو السلبية باش يخلق منك انسان متقاعس ومتواكل...لكن من وجهتو الايجابية ممكن انك تعمل منو عنصر متاع اصرار على تحقيق شيء ما...والاصرار على تحقيق المرغوب يدفعك للعمل اكثر وبذل مجهود اكثر نحو تحقيق ذلك الشيء وهذه على ما اظن فلسفة الدعاء فى الدين...كيما الكابوسان واحد يشربها باش تنشطو فى القراية والعمل والانتاج وواحد يشربها باش يقتل بيها الوقت وتصيرلو ادمان سلبي...لكن فى كل الحالات الدعاء يبقى بريء من اننا نحاولو نقرنوه بالجهل والتخلف...وهذا جوهر الموضوع.

لاعب النرد a dit…

المسألة زادت على حدهاART.ticulerفعلا يا
و انا تصور المسؤولية أو جزء كبير منها ترجع للاعلام اللي قاعد يوسع في قاعدة ها الفهم السطحي للدين و للوطنية و للفن و لكل شيء...
يا راجل ثمة عباد لو كان يقوللهم عمروا خالد والا (نسيت اسمو)حسان طيش روحك من السطح يطيش..
تي لو كان ابن سينا حي، علاش بن سينا،تي حتى الجاحظ ما ينجمش يعيش فسطهم...

Enregistrer un commentaire