mercredi 2 septembre 2009

أغنية ليست ككل الأغاني


الأغنية هذي تعجبني برشة من قبل ما نعرف قصتها وكيف عرفت قصتها عرفت علاش هي مميزة برشة كيما أي أغنية نابعة من أحاسيس صادقة..ملحن هذه الاغنية هو الفنان الكبير محمد التريكي إلي لحن هذه الأغنية بناء على قصة حب عاشها شخصيا .
الفنان محمد التركي حب وحدة ،حب زمني متع ناس بكري :-)،وهي كيف كيف حبتو..لكن للاسف إمتهانو الموسيقى مكانش عمل يليق و تنجم تمشي تخطب بيه وحدة في ذلك الوقت.. و الموزيكشي كان أقرب ما يكون إلى الزوفرة والهمال ..و عايلة حبيبتو رفضوا باش يزوجو بنتهم لواحد عوادجي ..والنتيجة إلي البنية مرضت وماتت من الحسرة وهو شد الفرش فترة لاباس بيها وكيف تحسنت شوية أحوالو، لحن الأغنية هذي إلي هي من كلمات محمود بورقيبة وأعتقد (إلي متأكد ينورنا ) أنو كتبهالو خصيصا له !

زعمة يصافي الدهر يا مشكايا..
ونعود نضحك بعد طول بكايا..

زعمة يولي الدهر ويلاقينا..
وننسى مالاتعاب ما قاسينا..

ونكمدوالي كان شامت فينا..
والي نكلم فيه فاتو خفايا..

زعمة الفلك يدور ليا يوم يردك..
ونشوف ورد الحسن مالي خدك..
ونحاسبك علي جرالي بعدك..
وعلى عذابي بفرقتك وشقايا..

ياما سهرت الليل وانا انوح..
نبكي ونشكي للي قضى ومطوح..
في محبتك راني مريض ملوح..
وانت طبيبي علاش تزيد جفايا..

عمرو خيالك ما يفارق عيني..
ومحبتك قايدة وسط كنيني..
وقتاش نلقاك وترضى ترويني..
وتطفي النار اللاهبة في حشايا..

يالندرى نعودو كيف ما كنا..
ومن بعد ما عذبتني نتهنا..
وانول فيك كل ما نتمنى..
ولا نموت وما تسمعشي غنايا..

كلمات محمود بورقيبة

5 commentaires:

WALLADA a dit…

آرت

توّا موش يتسمّى عناد هذا ؟؟؟ هيهيهيهي

ART.ticuler a dit…

هههه ..لا يا ولادة أنا عندي شاهد (تعرفو أنت ) إلي تدوينتي هبطت موخر لاسباب فنية هههه.. أما أهوكم زوز تدوينات يتكاملو

Azwaw a dit…

الشاعر محمود بورقيبة(1909-1956) فعلا

ART.ticuler a dit…

شكرا سيد علي لكن حبيت نعرف إذا كان تكتبت خصيصا لمحمد تركي

Azwaw a dit…

مسألة يكتنفها برشة غموض و صعيب باش تلقى الخبر الصحيح

Enregistrer un commentaire