lundi 1 juin 2009

ماهو حديث الورد?


نحب نشكر كل من ساهم وتفاعل إيجابيا مع "حديث الورد" ..ونحب نقول كلمتين خفاف نظاف و لو أنو ديجا عبرت عليهم في تدوينة سابقة :
1- فمة مثل فرنساوي يقول "الزهور الجميلة،كثيرا ما تكون مختبئة"
وهذا كلا
م يصح على الزهور وعلى المدونات زادة..
في البلوغسفير فمة مدونات فنية وأدبية ذات قيمة عالية لكن للاسف الأهتمام بيهم قليل ..كنت أشرت في تدوينة سابقة إلى مدونة جلال الغربي ..نحب نشير هنا إلى مدونة أخرى لا تقل قيمة هي مدونة نورالدين الهاني
إلي بالفعل حديثهم،حديث متع ورد وما تلقى لا سبان ولا محاكمات ولا دروس في التدوين
2 الملاحظة الثانية إلي نحب نأكد عليها هي:
حديث الورد إلي نحبو نسمعوه موش حديث الورد إلي يبيعو فيه في شارع الحبيب بورقيبة وإلا لافيات..هذكا ورد متع مظاهر ومناسبات كيف يبدى ساكت يضحك،فما بالك كيف يتكلم!! الورد إلي نحبوه يتكلم هو الورد إلي موجود في داخل كل واحد فينا !
زهرة شاقة ثنية ليها بين شقوق الأسفلت! وإلا
نوارة عاشقة تطل من ميزاب ..
هذا هو الورد إلي نحبو نسمعو حديثو ونعطيوه فضاء متع حرية في حديقتنا الدخلانية وناقفو في وجه تفشي عقلية :
-كان عندك طرف تراب في دارك ،طلع عرص وصب الدالة !
-والحديقة ؟؟
-آش تعمل بها الحديقة ؟الجنينة ما تجيب كان الوسخ و الناموس !!
بطبيعة الحال خذو كلامي في المعنين !
عقلية." طلع عرص وصب دالة" هي ذاتها عقلية "الحجاب" وعقلية "التقوقع على الذات "
يبدو من الوهلة الأولى إلي ما فمة حتى رابط بين الحجاب وصبان الدالة في جنينة.. لكن أعتقد إلي كل عقلية تعمل ضمن منظومة قيمية داخلية محكمة

هذاك علاش:

إلي يحكي على مرتو, ما يسمهاش باسمها ويقول :"الدار" موش غريب كيف يطلع عرص و يصب الدالة في الجنينة ,في نفس الوقت يصب حجاب على وجه مرتو !!
إلي ما يشوفش الجمال في وردة ما ينجمش يشوفو في وجه مرا !
وإلي ما تعجبو جنينتو كان كيف يغطيها بالسيمان والياجور باش يأكد إلي هي متاعو ،ما تعجبو مرتو كان كيف يغطيلها راسها باش يأكد،كيف كيف , إلي هي متاعو !
وإلي ما يفهمش في الورد والطبيعة بما في ذلك الطبيعة البشرية هو إلي يشري وردة بلاستيك مصنعة في الصين!! يهديها لمرتو إلي باش تفرح بها و تلبس الحجاب عن "قناعة"..
إلي ما يحبش الطبيعة ما ينجمش يحب العباد وما ينجمش يفهم معنى المعنى!
الحجاب هو فهم معكوس للطبيعة وكره للذات البشرية
Photo:ART.ticuler

2 commentaires:

brastos a dit…

prévert l'avait dit dans le meme contexte :

Je suis allé au marché aux oiseaux
Et j'ai acheté des oiseaux
Pour toi
Mon amour
Je suis allé au marché aux fleurs
Et j'ai acheté des fleurs
Pour toi
Mon amour
Je suis allé au marché à la ferraille
Et j'ai acheté des chaînes
De lourdes chaînes
Pour toi
Mon amour
Et je suis allé au marché aux esclaves
Et je t'ai cherchée
Mais je ne t'ai pas trouvée
Mon amour


حبيت نشكرك على الفكرة اللي حبيت ترسيها في البلوغسفير .. و اللي اكيد عجبت الناس الكل او اغلبهم .. لانّو الاختلاف و الحوار مهما احتدّ ما ينفيش اشتراكنا في حبّ الجمال

انا لم ايأس من انّ البلوغسفير لابدّ ان يرتقي الى مستويات ارقى ، و تكون فيه الصراعات السياسية و النقاشات الفكرية مجرّد جانب من جوانبو .. هكّاكه يولّي فيه ما يتزار و ما يتدخل و ما يكتشف

لتوّ ما فهمناش اللي عنصر الطرافة و الاضافة و المفاجأة هام برشه في ايّ تجمّع بشري

اذا نقابل نفس الاصدقاء في نفس المكان و نفس الزمان باش نحكو في نفس المواضيع .. هاذا بالنسبة ليّ سينونيم متاع : موت

اذا انا و صديقتي/حبيبتي/زوجتي ... نمارسو الحب/الجنس في نفس المكان و نفس التوقيت و نفس الاضاءة و على نفس الموسيقى و بنفس الطريقة .. اكيد باش نبحث على غيرها و تبحث هيّ على غيري

كيف كيف ... هنا

اذا ما نتفاعلوش مع هالـ"هبلات الفنيّه" من حين لاخر .. مهما تكون خارقة للعاده و مفاجئه و مقربعه .. فانّو نتصابو بالملل و ندورو على بعضنا و نتعاركو عرك خايب

شكرا على انّك دعوتنا الى الانصات الى احاديث الورد

ART.ticuler a dit…

شكرا برستوس على هذا التعليق ..
حديث الورد هو الألترنتيف لحديث الوصاية والاملاء.. حديث التلصص على المدونين وكتابة القوائم بأسماء المارقين عن القانون ..
حديث الورد هو نافذة صغيرة على عالم تدوين راقي وبدون عقد ومركبات نقص أو مركبات إستعلاء..

Enregistrer un commentaire