vendredi 29 mai 2009

علاش نحنا هكا ؟


زرت العديد من الدول الأوروبية وفي كل زيارة يسبقني سؤال :علاش هوما أحسن منا ؟ علاش الدنيا منظمة ونظيفة والناس الكل تضحك و شايخة في دنيتها ونحن ميلي تحط ساقك في المطار ،تبدا المشاكل وآش عندك ما تصرح بيه للديوانة ؟علاش الألماني في بلادي يتعدى بجنبي مباشرة للنزل وأنت على خاطرك تونسي يفرتلك الديواني عشك ؟ و نفس الألماني نرجع معاه في نفس الطائرة لالمانيا وهو في بلادو يتعدى كيف كيف مباشرة ..وأنت على خاطرك أجنبي يوقفوك ويقلبوا الباسبور بالميكروسكوب ..! علاش ؟ علاش نحنا مهانين في بلادنا وخارج بلادنا؟

أنا نقوللكم علاش !

على خاطر مازلنا نعتبرو الزهور حرام ومازلنا نقتلو كل واحد (ماديا أو معنويا) ارتد على دينو ونقتلو أولادو معاه !

على خاطر أشباه المثقفين ما يعتبر نفسو مثقف كان كيف يحكي كلمتين بالفرنسية والبعض يفتخر إلي "ما يعرفشي يكتب وإلا يتكلم بالعربي" وكل يوم يهبطلنا ليستة في الكتب إلي قراهم, بالفرنسية طبعا وكأنو الثقافة هي مطالعة وموش تفعيل للفكر !

نحن هكا على خاطر البعض إستقال من مهمتو وإكتفى بالحديث عن شعراء توجدوا في القرن الرابع عشر في زك الدنيا ونسى إلي على بعد كيلومترات قليلة من الجامعة إلى ساكن في برجها فمة ناس تموت من الجوع !! هاو علاش نحن هكا !!

على خاطر المرا مازلت تعتبر نفسها "على ذمة راجل" وفي محفظتها أعلى الشهائد الجامعية! والآخر يسرق في الصور ويبيع ! أو كما قال براستوس يسرق في العنين متع الناس ويبيع فيهم !

نحن هكا على خاطر البعض غاضتو مكتبة "إيبلا" كيفاش تحرقت وما سألش مجرد سؤال: آش تعمل مخطوطات وطنية بتلك القيمة في مكتبة تابعة للاباء الأبيض وموش في المكتبة الوطنية؟؟ هل يوجد مخطوط فرنسي واحد في معهد العالم العربي في باريس؟

نحنا هكا على خاطر البعض يحب يبيعنا لفرنسا والبعض الآخر يحب يبيعنا للسعودية ! والبعض الاعظم يلفق ويرقع هذا مع هذا، باسم الأصالة والمعاصرة والنتيجة هي هاذي




.

1 commentaires:

anonyme17 a dit…

lors de mes différents voyages en Allemagne, j'étais ébloui par la présence d'une plante au moins dans chaque bureau..chaque réception.. chaque boutique ... et en regardant les immeubles on peut voir une plante à chaque fenêtre ...

Publier un commentaire