mardi 22 décembre 2009

ابحث عن عنوان لهذه التدوينة؟ أقر بالعجز

سي ديانة مغازين نجح لاول مرة باش يخليني نكتبلو تعليق وإحتفالا بتعليقي الأول عندو قلت خليني نشارك الناس إحتفالي على خاطر بصراحة شيء ينفخ ..


بصراحة راك كثرت وتحب تطلع الماء للصعدة بالسيف وقتلي إلي الصعدة نعانيو منها الكل والماء أساسا ما فماش ..
هذا هو شنوة مرضك؟تركريك التاي متع ناس عايشة الفقر وراضعتو ..؟!!!
كان من الأجدر بيك أنك تسأل هوما علاش هكاكا؟
زعم
ة قداش يخلص في النهار؟ زعمة مؤمن على حياتو؟ وعلى المرض؟ زعمة يتمتع بجميع حقوق الشغل ؟ كيفاش تحبو يخدم وكرشو فارغة ؟ وشهريتو بالكاد تخليه على قيد الحياة ؟ إلي يقبضوا هو في شهر يسرفو غيرو في سكرة ورشيق ..
كان من الأجدر بيك أنك تأحذ مكانو وتحكم عليه موش تغزرلو من فوق بنظرة إحتقار ..قال شنوة مرضوني..أنت هو إلي مرضتنا بكلامك إلي موش معقول .
ما مرضكش إلي على كل 1000 تلميذ واحد بركة يوصل يتحصل على شغل بالشهادة متاعو ؟
ما مرضكش إلي تونس الأولى عربيا والرابعة عالميا في حالات الطلاق الناتج أساسا عن مشاكل مادية ؟
ما مرضكش إلي الشباب حارق إلى الموت هروبا من البطالة؟
ما مرضتكش وجوه الناس في الشارع تمشي وتحكي وحدها من كثرة المشاكل ؟؟
إذا كان تونس جنة ( وهي بالفعل جنة لكن لاسباب اخرى يصعب عليك فهمها ) علاش الناس هاربة للموت في زوارق الموت ؟
علاش البطالة متفشية؟
علاش شهادة الباكلوريا التونسية لم يعد الاتحاد الأوروبي يعترف بها ؟
وشهادة الأستاذية يقع اعتبارها بكالوريا +2 ?
وعلاش وعلاش والقائمة تطول.. هذه هي الأسئلة التي لا بد من الأجابة عليها قبل أن تتحدث عن عامل يومي لو سألته عن أمانيه لانفجر بالبكاء ! أو ربما بالضحك ..لا فرق ! وما الفرق عندما تستوي الحياة إلى صراع يومي دون نهاية مع لقمة العيش لا غير ..

في أحدى القضايا المرفوعة أمام القضاء للطلاق لعدم قيام الزوج "بواجباته الزوجية" سأل القاضي الزوج عن السبب فرد الزوج بكل عفوية:"الحق متع ربي ما نجمش،سيدي القاضي.. أنا عامل يومي وفطوري باكو لبن وربع خبزة كيفاش باش تكون عندي الصحة والقوة ؟

3 commentaires:

bacchus a dit…

آرت عيب عليك تسأل في أسئلة صعيبة. واحد يحب يزيد في الإنتاج والإنتاجية وأنت تحكي على الجوع والعطش ياخي ما سمعتش بماكينات تعمل بدون طاقة ولاراحة وقت تطيح يسبوها كيفاش طاحت. معقول هالأسئلة الصعيبة تو

Al-Hallège a dit…

الحمد لله اني صمت عن قراءة نصوص هذا المدوّن الذي غادر التدوين فأراحنا من وجع الرأس و ما لبث أن عاد سريعا

Hamadi a dit…

الحلاج: صوم مقبول إن شا الله :)
ارت: ثمة ناس عايشة في عالم آخر بدون أدنى علاقة مع الواقع

Enregistrer un commentaire