إستدعاء

لان الأشياء البنينة ما تكون بنينة بالحق كان ما تتقاسمها مع الناس إلي تحبهم ..حبيت نستدعاكم تشاركوني المناظر البنينية برشة إلي عشتها البارح في بارك في أطراف المدينة.. وديما نرجع لنفس السؤال : شنوا المانع باش يكون عندنا بارك كيف هذا ؟
النوار والطبيعة بصفة عامة ،بخلاف كونها حلوة ،هي ترجم حب الحياة و تعطينا إحساس بالوجود..و فقط الشعوب إلي تعرف معنى الوجود هي إلي تبدع وتنتج وتخلق أما الشعوب إلي من أول نهار ليها في الدنيا تبدا تخمم في الآخرة وفي الموت وفي الثعبان الأقرع وكيفاش تسلكها في الدنيا باقل الأضرار.. الشعوب هذي هي أساسا خارج التاريخ ( بالمناسبة راهو الموت يأخذ برشة أشكال: إبتداء من السيكان البلاستيك الكحل إلى إغتيال الأمل في عيون الأطفال يوم العيد ..هذا الكل إسمو ثقافة الموت ) المهم نرجع لحديثي على الوجود ونختم بحكاية فيها الكثير من العبرة : في ألمانيا المهزومة بعد الحرب العالمية الثانية ووسط الدمار الهائل لاحظ جنرال أمريكي تابع لقوات الحلفاء امراة ألمانية تضع باقة من الزهور وسط بيتها المنهار أو بقايا بيتها:إستنتج من ذلك أن هذا الشعب سينهض من جديد وفي وقت قصير! وذلك ما حدث! يوفى الحديث