إلى جل المدونين قبل الطوفان

أنا يظهرلي إلى المستوى عموما في البلوغسفير هبط أكثر مما يتصورو العقل ويقبلو تسامح أي شخص متملح.. ولينا نشوفو في كلام هابط تقولش علينا في مرشي سيدي البحري..سفناريا وبطاطا وشلايك و عملاء..
نتصور إلي البعض ما كانش باش يتمادى في إستعراض الزبالة متاعو لو لا صمت الكثير من المدونين عما يجري :بمنطق اش مدخلني؟خلي ياكلو بعضهم.. لا يرد فاس على هراوة.. بل أن بعض المدونين ترك تعليقات (عن قصد أو غير قصد) كلها شتم و تهجم مجاني على تعليق متع مدون آخر :مدام ماهيش ضدي مايهمنيش ! ويكمل "يتناقش" معاه عادي جدا..
المنطق هذا ومنطق معاملة الطرفين على نفس المستوى،قال شنوة،انتوما الزوز ماكمش متاع حوار ،هذا هو الشيء إلي باش يهز البلوغسفير في داهية
أنا مانيش فاهم كيفاش نتقاسم مع مدون فكرة وحلمة وبرشة وقت حلو وكيف نشوفو يتسب و يتشلك بشكل مجاني نسكت ؟؟؟
إذا كان حتى واحد ما يملك الحقيقة وهذا صحيح ،فالأكيد إلي ما يقفوش الزوز على نفس المستوى منها .وأبعد واحد على الحقيقة هو إلي واقف على الربوة يصدر في الأحكام من الفوق:داخل في الربح خارج من الخسارة!لان اصدار الأحكام دون أخذ موقف، عملية ساهلة برشة!
وقتلي أي مدون يتجاوز حدودو ،يلزم الكلنا نقاطعوه وكان لزم نقاطعو إلي ما قاطعوش ، ومعادش ننشرلو أي تعليق، على خاطر حتى واحد فينا ماهو باش يمنع من الطوفان لو كان يغرق البلوغسفير في صناعة تحويل الزبالة إلى مادة قابلة للنقاش

العجوزة هازها الوادى وهي تقول اسلاموفوبيا

القصة إلي باش نحكيها واقعية و عشتها شخصيا
وفكرة سرد القصة جاتني بعد ما قريت تدوينة براستوس (هنا)
في 1997 كنت نسكن في المبيت الجامعي والمبيت الجامعي ماهوش كيما في تونس كل واحد و بيتو (ولو هذا النوع موجود أيضا لكن بقلة) لكنو مبيت جماعي مختلط.
وكل "شقة" يتراوح عد القاطنين فيها بن 2 و 8 طلاب كل واحد عندو بيتو لكن بقية التجهيزات مشتركة مطبخ وبيت إستحمام و قاعة جلوس..
للالتحاق بالسكن، هذا يلزم كل طالب يعمل مقابلة مع جميع أفراد البيت ويحكي على ميولاتو و أفكارو و ذوقو إلخ ..ويلزم يتحصل على الموافقة من كل فرد باش يحق للطالب السكن مع المجموعة هذيكة..علاش نحكي في حكاية هذي؟
علا خاطر في الطابق الاسفل كان فمة بيت يضم 4 طلاب من بلد مغاربي إستحوذوا على الشقة و قاموا بتنظيفها من العناصر "الكافرة"..أي يكفي باش يدخل واحد في السكن باش يستعمل حق "النقض " على أي طالب من غير المسلمين ومع مرور الوقت أصبحت هذه الشقة معروفة باسم " فوندمتليست" ..وهذا مثال واضح كيفاش الاسلامين يستغلو النظام الديمقراطي وحق التصويت باش ينقلبو عليه في أول مناسبة وبعد ما كانت الشقة مثال في التعايش بين الجميع :نساء ورجال ألمان وغير ألمان، ملحدين و نصف ملحدين أصبحت ذكورية 100% ,أصولية 100%..
سكان الشقة الجدد هوما من ذوي القمصان البيض واللحي السود وكانوا يوميا في الصباح يقيمو الأذان!!
لا موش يقيم فيها الاذان بالمعنى التونسي لكن يقيموا الاذان بالفعل لصلاة الصبح وبصوت عالي جدا ..وتشكاو الطلبة- الجيران من السلوك هذا و وقع التنبيه عليهم أكثر من المرة.و في الأخير وقع إخراجم بالقوة من الشقة الجامعية. تصوروا في عمارة متكونة من العديد من الشقق يقوم واحد على الصباح يفتح النافذة متاعو ويقوم يؤذن!!
ما نيش باش نحكي على تصرفاتهم معاي البدائية و لعناتهم الإسلامية هههه على خاطر أنا في نظرهم كافر وزنديق..
لكن باش نزيد نحكي على واقعة عشتها مع زوز منهم في الحافلة إلي نستعمولها للذهاب إلى وسط البلاد وهو اش شفت و سمعت:
قام احدهما لترك مكانه لمسن ألماني لا يستطيع الوقوف..فما كان من زميله إلا أن نهره قائلا: إنه كافر لا تترك له المكان!!!!
للعلم فانو الزويز عندهم لجوء سياسي ويتقضاو في مرتب من الضرائب إلي يدفعها ذلك المسن..
باهي, تحبوش نزيدكم غريبة أخرى?:من نفس هذا البلد المغاربي هنالك ثلة من امتهن السرقة والصلاة .ولينا في كل مقهى نلقاو ورقة معلقة :احذروا الاصابع الطويلة ! اصبحنا منعوتين بالصبع في جرت ها الحثالة..
وأين يضعون المسروق؟ أيا تصوروا فين؟؟.. في المسجد!! قال شنوة،نحن في دار الحرب وهذي غنيمة من الكفار ؟؟؟!!!!! راهو تجي تحاول تفهم تبهم من قوة الجهل.
أنا نعرف مسبقا وفي كل مرة يقع نقد مثل هذا السلوك باش يقولو :هذا شيء شاذ و لا يمثل الاسلام و ما ذنب القانون إن أخطأ القاضي و هات من هاك اللاوي..لكن أنا نقول :
..العجوزة هازها الوادى وهي تقول اسلاموفوبيا

الصور: المبيت الجامعي والمطبخ المشترك
...

كلنا فنانون18

BAUDELAIRE

L'ENNEMI

Ma jeunesse ne fut qu'un ténébreux orage,
Traversé çà et là par de brillants soleils;
Le tonnerre et la pluie ont fait un tel ravage,
Qu'il reste en mon jardin bien peu de fruits vermeils.

Voilà que j'ai touché l'automne des idées,
Et qu'il faut employer la pelle et les râteaux
Pour rassembler à neuf les terres inondées,
Où l'eau creuse des trous grands comme des tombeaux.

Et qui sait si les fleurs nouvelles que je rêve
Trouveront dans ce sol lavé comme une grève
Le mystique aliment qui ferait leur vigueur ?

- Ô douleur ! ô douleur ! Le temps mange la vie,
Et l'obscur ennemi qui nous ronge le coeur

Du sang que nous perdons croît et se fortifie!

آه من حياتنا اليومية.

عشرة اسئلة جديدة ماعندها حتى علاقة بالدين (ضاهريا)
1- علاش نعتبرو الصغار "مفرخة" ونتعاملو معاهم ك"شيء" ونجعلوهم فرد مرتبة هوما والمال؟ (بدون ذكر المصدر ) في حين أن الانسان لا يقدر بثمن ومن بعد نقولو شبيه الكلنا ذواتنا مقموعة ومافماش إحساس بالكيان؟
2-علاش نعتبر الطبيعة ومشاكل البيئة هي أمور ما تهمناش وإلي الطبيعة تخلقت لينا احنا وكأننا لسنا جزءا منها؟
3- علاش ديمة ناصرو القوي ضد الضعيف /والجماعة ضد الفرد/ والعادي ضد الابتكار / والمتعارف عليه ضد الشاذ/ و الجريدة ضد المنطق؟؟
4-علاش في المسلسلات و الأفلام و غيرها نتعاطفو ديمة مع الفقراء وفي حياتنا اليومية ....آه من حياتنا اليومية...
5- علاش نكذبو؟ (سؤال ساهل برشة)
6- علاش ما زلنا نتعاملو بمنطق "عينك ميزانك" والليقة تجيب " سواء في العمل أو في علاقاتنا الانسانية ؟ وإلي موش إنسانية زادة؟
7- علاش نعملو في حرب بين بعضنا من خلال 22 لاعب وكرة ؟ والحرب الحقيقية هي ضد الجهل و القمع والتخلف ؟
8- علاش الواحد منا، على قد ما ذاتو ذايبة في المجموعة على قد ما ينفخ روحو بالاوراق؟
9- علاش نعتبرو الفن و الفلسفة والاداب حكايات فارغة وما توكلش الخبز
وكأننا نعيشو كان بالخبز ؟
10- علاش نعتبرو الأنتماء إلى رقعة جغرافية مدعاة للفخر والاعتزاز أو العكس؟

صورة :قشور برتقال
Photo :ART.ticuler

كلنا فنانون17

أين ضحكي وبكائي وانا طفلٌ صغير.
أين لعبي ومراحي و انا غضٌ غرير.
أين أحلامي و كانت كيفما سرت تسير ؟
كلها ضاعت ، و لكن كيف ضاعت
لست أدري ...لست أدري

إيليا أبو ماضي

(عشرةاسئلة محرجة لمن لا يملك الحقيقة بعد (تتمة

نحب اليوم نواصل تدوينتي متع البارح وإلي حكيت فيها على الاسئلة إلي لازمنا نجاوبو عليهم باش نجمو نعملوا خطيوة لقدام..
باهي، إلي يعتبر روحو يمتلك الحقيقة بالف ولام التعريف موش لازم يكمل يقرا التدوينة وإلي مازال عندو رغبة باش يطرح أسئلة محرجة على روحو أولا, يتفضل نطرحوهم مع بعضنا ..
الاكيد وما نيش باش نجيب حاجة جديدة إلي موروثنا الثقافي يرتكز في جانب كبير منو على الدين وإلي الموروث هذا ما عرفناش اش نعملو به بالضبط ..فمة شكون قال : تلك أساطير الأولين وبالتالي لابد من تجاوزو وفمة شكون قال: موروثنا هو هويتنا وشقف الهمة ومن غيرو نحن ما نجيو شيء....
باهي أنا نحب نقول إلي أمام هذا الصراع إلي نسميوه عادة صراع الأصالة والمعاصرة ،القديم والجديد ،الماضي والحاضر..ما نجم نتسلح كان بالعقل باش نجم نفض المشكل وكيما قال نجم: " و معاي العقل دليل"
إلي يقول عقل يقول :تفسير و تحليل و دراسة و تمحيص و ما إلى ذلك ..
وبما أني لا ادعي إمتلاك اجوبة فعندي شوية اسئلة نحب نطرحهم معاكم :
1- علاش ما نعتبروش تاريخنا السياسي من سقيفة بني ساعدة إلى اليوم هو تاريخ قائم على الاغتيالات والقتل و التنكيل بالخصم السياسي ؟
2- علاش ما نعتبروش إلي الخلفاء الراشدين عباد كيفنا كيفهم وإلي الجاه والسلطة كانو وراء عدد كبير ممن حكموا بقبضة من حديد باسم الدين ؟
3-علاش مانعملوش غربلة للاحاديث النبوية إلي تجمعت قرون بعد وفاة الرسول ونستبعدو الأحاديث إلي تتنافى مع أبسط قواعد المنطق السليم؟
4- علاش نعتبرو النصوص الدينية غير قابلة لاعمال العقل فيها في حين أن النص القراني ذاتو يدعو إلى اعمال العقل و البصيرة :أفلا تبصرون.أفلا تعقلون...
5- علاش نعتبرو التطور البشري وقف منذ 1400 سنة وإلي البشرية وصلت إلي قمة " السعادة الأنسانية" ؟؟ (هاني نكثر من الأظفار وربي يستر :-))
6- علاش نعتبرو تطبيق الشريعة غاية في حد ذاتها وموش وسيلة للوصول إلى مجتمع "مثالي"؟
7- علاش ما نعتبروش إلي تطبيق الحدود فيه مس من كرامة الأنسان إلي وقع تكريمو في نفس الكتاب ؟
علاش كيف يتخالف النص مع العقل وإلي يعبرو عليه "أهل الأختصاص" ههههه النقل والعقل نطفيو الضوء على العقل وناخذو بالنص حتى ولو كان فيه مضرتنا؟ ونقولو إلي المصلحة موجودة لكن ما يعرفها كان إلي خالقها؟
8- علاش في القرن الواحد والعشرين مازلنا نتعطاو مع ما "يسمى بقضية المراة" كمفتول ضد السخانة كل مرة ترتفع فيه معدلات البطالة بين الرجال؟
9- علاش نعتبرو أرواحنا خير أمة في حين أن كل الوقائع تفيد عكس ذلك؟
10- علاش نعتبر الرسول ذاتو إنسان غير عادي وخارق للعادة في حين هو بيد وعلى لسانو قال ما أنا إلا بشر مثلكم؟؟وأنا أبن إمرأة كانت تأكل القديد
؟؟
باهي هاذي جملة من التساؤلات وحبيتها تكون مركزة على الجانب الديني إلي هو بالحق يمثل معضلة في الفكر
غدوة نكمل جملة أخرى من الأسئلة لكن خارج إطار الدين

كلنا فنانون16

مسلم،علماني،قومي،إنساني،متملح:هذه الاسئلة لابد من الأجابة عليها

ما فمة حتى ادنى شك في أن العالم العربي الاسلامي يعيش احلك فترات تاريخو.دخلنا للقرن ال-21 ومعانا حوالي 50% من الشعب يعيش حالة متع أمية بدائية معنتها لا يعرف يكتب و لا يعرف يقرا .ونزيد عليهم منطق القبيلة والعشيرة إلي مازال قائم .إذا كان موش في شكلو القديم راهو في شكل تقاسم السلطة بين العائلات الأكثر نفوذ وفي أحسن الحالات في شكل صراعات جهوية،تثور في أول مناسبة كروية!
التركيبة هذي البدائية للمجتمعات العربية،ونزيد معاهم الفقر والجهل حالت دون،قيام دولة قانون.
آش معناها دولة قانون؟ معناها دولة يسود فيها القانون على الناس الكل بقطع النظر على اصلو و فصلو و دينو ويكون الرابط الوحيد بين كل أفراد هي:المواطنة .وتكون دولة تنقسم فيها السلطات فعليا وموش كان في الدستور .
باهي، يقول القايل تي هاي الجمهورية الفاضلة متع أفلاطون وإلا المدينة الفاضلة متع الفارابي..?صحيح هي جمهورية الفاضلة مقارنة بواقعنا أما ماهيش مستحيلة.
فمة جملة من التحديات إلي لازمنا نرفعوها، والعديد من الأسئلة إلي لازمنا نجاوبو عليها بكل صراحة باش نقدمو خطوة في الاتجاه الصحيح.

تحبو تجاوبو على الاسئلة بصراحة؟ تفضل كملوا معاية التدوينة،ما تحبوش؟ موش لازم تكمل تقرا باش نجعلك راسك


باهي فمة على الاقل ثلاثة حاجات لازمنا نعرفوها قبل مانجاوب على الاسئلة إلي قدامنا :
1- أول حاجة :نحنا شكون؟ عرب؟ توانسة؟ متوسطين؟ مسلمين قبل كل شي؟بربر؟
2- لازمنا نعرفو ماضينا كيما هو، موش كيما نحنا نتصوروه وإلا نحبوه يكون
3- لازمنا نعرفو مستقبلنا.فين ماشين؟ أو بتعبير شاعري: بناء الأمل.وكيما نقولو في المدرسة:يحدوه الأمل
على خاطر ما فمة حتى شعب في التاريخ تقدم من غير ماكان عندو رؤية للمستقبل.
ألفين سنة لتالي كان الدين يلعب هذا الدور.هل لايزال الدين مهيأ للعب هذا الدور؟
باهي، بعد ما نحطو في مخاخنا المعطيات هذي نمشيو نحاولو نجاوبو على جبل متع اسئلة تستنا فينا :من بين هذه الاسئلة وأهمها على الاطلاق .علاش قلت أهم سؤال؟ على خاطر جوابنا عليه محدد لكل عمل يجي من بعد.
السؤآل الخطير هذا هو :هل أملك وحدي الحقيقة؟؟
هذا السؤال عبارة على لافتة كبيرة مكتوبة في طريق سيارة وهو باش يحدد الاتجاه متاعنا.بعبارة أخرى الزلقة بفلقة.وكيما تعرفو في الاتو روت ما فماش مارش أريار .
باهي نوقف اليوم هوني..وللحديث بقية
Photo ART.ticuler

علاش كيف نغزو بلدا نسميوه فتح إسلامي و كيف نتعرضو للغزو نسميه إستعمار؟؟

لا أريد الدخول في نقاشات سجالية مع أحد..فللحياة طعم ألذ خارج الكتب
ورغم ذلك فسأرد باقتضاب شديد على مع ورد في تعليق على تعليق معلق في إحدى المعلقات إلى طارق:

باهي،في الشكل:

كان من المفروض أن تنشر التعاليق الكل متاعك مرة وحدة أو تشير إلى أنك بصدد كتابة رد للبقية ،على خاطر ردك في الأول كان موجه فقط لمن امتدحوا تدوينتك و كان من الطبيعي أن أفهم من ذلك ما فهمت..وليس لي أن اعتذر عن خطأ لم ارتكبه!

في المضمون :

تقول:"مثلا بدئ الظاهرة في حد ذاتها (بمعزل عن المصطلح) في "الفتح الاسلامي" ؟؟؟

اناهو فتح إسلامي يا ولدي؟؟؟أنا نحكي على المصطلح"إسلاموفوبيا" وقلت مانيش باش نشد المصطلح على خاطر أي شخص ينجم يدخل للانترنت ويلقى روحو غارق في المعلومات حول هذا المصطلح من 1925 إلى 1997 إلى 2006..واستعراض العضلات في المراجع في مجرد تدوينة يمكن ما يقراها حد هو مضيعة للوقت والجهد.

تقول:خاطئ لسبب بسيط هو أنو "الغرب المسيحي" في القرن السابع ميلادي ما كانش يفرق بين مسلمين و "مشارقة"

وهاو أنا اش قلت:مرورا بكل الحروب إلي قامت باسم الدين ،بين شرق مسلم ( الحملة الصليبية على تونس كانت تعتبر حملة على الشرق) و بين غرب مسيحي
كلامي أوضح من الشمس :تونس رغم أنها ماهيش في الشرق تعتبر في الفكر الأوروبي :orient
وهذا دليل إلي هما ما يفرقوش مابين شرق و مسلم وإنت لهنا قاعد تعاود في كلامي لكن بتحريفو

تقول: " معنى "القانون الدولي".. الجميع يتصرف على أساس أنه "ذئب" أو يؤكل. "

هذا يعني أن "الفتوحات الاسلامية" كانت وحسب منطقك تصرف على أساس " "ذئب" أو يؤكل. " ؟؟؟؟ بما أن الجميع (أعيد:الجميع كما قلت) كان يتصرف على هذا الأساس فلماذا الأسرار على نعث ب"الأسلامية" هل هنالك نص في القران ،نص واحد، يدعو المسلمين إلى أن يكونوا ذئاب؟؟ لماذا لا نعترف بان حروب ما يسمى بالفتح كانت حروب استعمارية توسعية باسم الدين تماما كالحروب الصليبية؟؟
لماذا عندما نغزو بلدا نسميوه فتح إسلامي و كيف نتعرضو للغزو نسميه إستعمار؟؟

باهي نجي توا لنقطة اعتبرها صديقنا مهمة: وهي اشارتي إلى أن ظاهرة الاسلاموفوبية موجودة في "اللاوعي الأوروبي" لاسباب تاريخية نعرفوها الكل.ولاحظ إلي هو قال نفس الشيء.

باهي،كيف هي موروث أوروبي قديم جدا، كيما إنت قلت آش مدخل البلوغسفير في هذا؟؟؟؟ موش هذا عين الاسقاط ؟؟ كأن أقول أن البلوغسفير الألماني له توجهات القرامطة أو المرجئة؟!!!

تقول: مجرد استعمال الكلمة مش حجة على حتى شي. كل واحد و كيفاش يستعملها"
لي عندك رجاء: طبق هذه الفكرة على البلوغسفير التونسي!!

نقف هوني و البقية في العدد القادم

كلنا فنانون15

إسلاموفوبيا :ردي إلى طارق

إنتظر قليلا،سنقطع لك رأسك وبعدها سينتهي صراخك الأسلاموفوبي




لا شك أن مصطلح الاسلاموفوبيا من أكثر المصطلحات اثارة للخلاف رغم بساطة تركيبو :إسلام + فوبي (خوف) أي الخوف من الاسلام /المسلمين
مانيش باش نشد المصطلح ونسيب الظاهرة ( تفسير وجذور المصطلح موجودين في أي كتاب وخاصة في الأنترنات وهي في متناول أي شخص )

الظاهرة:
الظاهرة ،حسب رأيي الشخصي، ما توجدتش بعد ظهور المصطلح (1997) بل موجودة من قبل هذا التاريخ و المصطلح ما هو الا إذان بخروجها من القوة إلى الفعل، من اللاوعي إلى دائرة الوعي.
الخوف من الاسلام والمسلمين ماهوش وليد البارح أو 11 سبتمبر ،هو خوف "متأصل" في اللاوعي الأوروبي منذ غزو /فتح (كل واحد يقرها كيما يحب) لاسبانيا مرورا بكل الحروب إلي قامت باسم الدين ،بين شرق مسلم ( الحملة الصليبية على تونس كانت تعتبر حملة على الشرق) و بين غرب مسيحي.وصولا إلى الثورة الايرانية وعداءها الصريح للغرب وبطبيعة الحال نضيفولها "غزوة منهاتن" و التسمية تغني عن أي التحليل..

استعمالات المصطلح :
وقع إستعمال المصطلح في الكثير من الأحيان لغايات مشبوهة من زوز أطراف ،وموش غريب انو الزوز أطراف هما متطرفين:
1-البعض،و في الغرب تحديدا، إستعمل هذا الاحساس بالخوف من الاسلام لتمرير ايديولوجية عنصرية لا غبار عليها وخاصة اليمين المتطرف في كل دولة أوروبية تقريبا .
ولتمرير هذا الخطاب العنصري يقع الخلط المتعمد بين الاسلام والمسلمين والعرب وكل ماهو شعر أسود ووجهو قمحي..وربط هذا بما حدث ويحدث في افغانستان والصومال و العراق وغزوة منهاتن و غزوة مدريد إلخ..
بل أن البعض صرح علنا انو إسلاموفوب وأن خوفو من الاسلام مبني على وقائع وتصريحات من المسلمين أنفسهم و من خلال تعاملهم مع المرأة و محاولتهم فرض الشريعة مكان قوانين الدولة.(فرنسا)
-٢ باهي، شكون زادة إستغل الظاهرة/المصطلح؟ هم الاسلامين المتطرفين أنفسهم، فأصبحت كل محاولة لنقد الدين الاسلامي/ المسلمين هي دعوة عنصرية وإسلاموفوبيا
وكيما كل محاولة لنقد السياسة الاسرائيلية يقع نعتها بالانتيسيميت ،زادة كل محاولة لنقد الاسلام أصبحت تنعت بالاسلامفوبيى و هذي بطبيعة الحال محاولة للالتفاف على حق نقد الفكر والأديان مهما كانت.

الاسلاموفوبيا :المبررات
ما نتصورش إلي الخوف من الاسلام في الغرب أتى من اللاشيء. بل،إضافة إلى العوامل التاريخية، فأنو تصرفات وتصريحات بعض المسلمين باش منقولش جل المسلمين تعطي الضريعة لمثل هذا الخوف. بل حتى ما يدعي البعض أنها "كليشيات" مثل الزواج باربعة ،وقطع يد السارق ،ورجم الزاناة، و تقسيم الميراث وغير ذلك مما سمعته الاف المرات هنا ،هو للاسف واقع لايزال العالم العربي والاسلامي يرزح تحته من المغرب إلى الباكستان مرورا بالصومال..فلا يمكن والحالة تلك، الزعم بأنها مجرد تصورات و خزعبلات للفكر الأوروبي الذي يشكو من الكثير من الايقوسنتريسم..انها واقع بل مطلب لكل الحركات الديننية التي تشتغل اليوم سواء هنا في "دار الكفر" أو في "دار الأسلام" وكأن تطبيق الشريعة هو غاية في ذاته..

الاسلاموفوبيا و البلوغسفير
لكي أكون واضحا وموضوعيا فان جل ما قرأته في البلوغسفير لم ار فيه أي مسحة تتسم بالاسلموفوبيى بل أن إستعمال هذا المصطلح لا يتناسب لا شكلا ولا مضمونا مع البلوغسفير.
أولا لان كل من كتب وانتقد الاسلام هو ينتمي إلى بني جلدتنا بالتالي لا يمكن الحديث عن إسلاموفوبيا عنصرية أو غيرها
ويذكرني هذا بحادثة وقعت لي لما كنت ادرس في باريس وكانت القائمة على شؤون العمارة (كونسيرج) من أصل مغربي ،وصادف إن اختلفنا في موضوع ما،فقالت لي-"أسمع أنا لا شيء عندي ضد الأجانب فانا لست عنصرية!!! هههه
لا يمكن أن يكون المسلم الثقافي /أو بالانتماء عنصري ضد من يشاركهم نفس الثقافة ..
ثانيا: لان جل ما قرأته كان يتسم بالتحليل الفلسفي (على سبيل الذكر عياش من المرسى) أو بالرجوع إلى مصادر التشريع (على سبيل الذكر أيضا،عاشور) ولم يكن في غالب الأحيان تهجم مجاني أو دون سند.

مخ الهدرة :

أرى في الحديث عن الاسلاموفوبيا في المدونات التونسية إسقاط لمفهوم وجد للتعبير عن شعور و موقف تجاه علاقة بحضارة أخرى كانت دائما تاريخيا محل تجاذب وصراعات وهو ما لا ينطبق في أي حال من الأحوال تجاه تن بلوغ المسكين :-))
إلا إن كانت الغاية تكميم الأفواه و الوقوف بالمرصاد لكل محاولة نقد لهذا الأرث الذي حان موعد نقده وإزالة غشاوة التقديس عنه وعن أعيننا.

كلنا فنانون 14

تحية إلى لاعب النرد

صديقنا لاعب النرد كتب نص جميل و عفوي وننصحكم باش تقراوه وفمة فقرتين عجبوني فيه بصفة خاصة.بعد إذن لاعب النرد، اعدت صياغتهم

الانسان متناقض
كالشعر
وأهش من جناح فراشة
يبتلعه عسل الكلام
و ينتشي لانتصار النصر و لهطول المطر
على شفاه السنابل
يرقص للقاء صديق قديم في ثنايا معطف الشتاء :
يا ابن خلدون الجيب "أضيق من خطاك"
فادعو أصدقائك لمساء السبت
قبل أن تفقد الشاشة ألوانها في خوذة جندي قديم
وقبل أن يزورنا ظلام منتصف النهار..
فيئن الزمان في جسد يرتعش

Photo:ART.ticuler
.

Nos ancêtres!

Dans le cadre de fouilles dans le sous-sol, jusqu'à 100 mètres de profondeur, des scientifiques russes ont trouvé des vestiges de fil de cuivre qui dataient d'environ 1000 ans. Les Russes en ont conclu publiquement que leurs ancêtres disposaient déjà, il y a 1000 ans, d'un réseau de téléphone en fil de cuivre.

Pour faire bonne mesure, les Américains ont également procédé à des fouilles dans leur sous-sol jusqu'à une profondeur de 200 mètres. Ils y ont trouvé des restes de fibre de verre. Il s'est avéré d'après les scientifiques Américains que leurs ancêtres disposaient déjà, il y a 2000 ans, d'un réseau numérique en fibre de verre. Et cela, 1000 ans avant les Russes !

Quelques semaines plus tard, en Tunisie, le communiqué de L'Agence de Presse Tunisienne est publié :« Suite à des fouilles dans le sous-sol tunisien, jusqu'à une profondeur de 500 mètres, des scientifiques et chercheurs tunisiens n'ont rien trouvé du tout. Ils en concluent que les anciens tunisiens disposaient déjà, il y a 5000 ans, d'un réseau WIFI.

كلنا فنانون13

إلى القائمات على حسن سير الطابور الخامس

أقر انني لم أزر هاته المدونة إلا في مناسبتين:
الأولى : في عام الفيل
والثانية: يوم رجمت بحجر من سجيل.
.وسبب عدم زيارتي لهاته المدونة يعود أولا لعنوانها الاستفزازي وثانيا لحرصي الشديد على عدم الدخول في تحالفات وتجمعات و تكتلات للكل ضد الجزء و للجزء ضد الكل..
ويوم أغمضت عيني على عنوانها ودخلت وجدتها "تكافح من أجل العدالة و الحرية" قلت :لا بأس.. لكن عندما وجدت إسم مدونتي مصنف في قائمة "مدونات شقيقة و صديقة " هذا أثار غيضي لعدة أسباب :
1- إذ كنا نحبو الحرية وناضلو من أجلها، عاد من باب أولى وأحرى نحترمو حرية الآخرين وعدم إستشارة صاحب المدونة إلي وقع تصنيفها هو إعتداء على حريتو في الاختيار إلي يعتبر من ركائز الحرية

2- التصنيف هو ترجمة لعقلية الوصاية..وحتى حد ما عندو الحق يضع "علامات في الطريق" لتنبيه القراء :حذار ،بعد 20 متر هنالك إنحدار تعقبه مدونة أو بعد 100 متر هنالك إستراحة تدوينية !!! كل مدون وكل قاريء له من الذكاء و الرشد ما يمكنه من معرفة ما يريده دون وصاية من أحد!

3- التصنيف كفكرة ارفضها أساسا وهي تناقض ب-180 درجة فكرتي الأساسية والتي من أجلها بعثت هاته المدونة، وهي رؤية الاشياء بحرية
voir autrement!

لذا فانا أطالب القوائم القائمة على حسن سير الطابور،و بدون تكليف، بمحو إسم مدونتي من كل تصنيف ..

كلنا فنانون 12

غزة -دعاء-بورصة

أهوكا أكثر من مليار مسلم يدعيوا لمدة أسبوع كامل لفتح المعابر
معنتها 1300000000 مسلم نضربوهم في 5 صلوات ونزيد نضربهم في 7 أيام نلقاو 4550000000000 دعوة بفتح المعابر بخلاف الصرف ورغم عن ذلك المعابر ماتفتحتش !زعمة شنوة الحكاية؟
أنا نقول :يا إما علاقتنا بالرب علاقة "كم" بالتالي إلى يجيب أكثر وإلي يدعو أكثر وإلي يدفع أكثر يهز الكل ..كما لعبة كارطة:اللص يهز الكل(تحية إلى لص رقم واحد :-))
وإما علاقتنا بالرب هي علاقة "كيف" وفي الحالة هذي مانيش فاهم علاش نحددو المدة باسبوع ؟ وكيف تتحل المعابر قبل؟ اش نعملو؟ نوقفو؟ وإلا نزيدو نكملو الأسبوع؟ وكيف ما تتحلش كيما واقع توا،اش نعملو؟ نطفيو الضوء ونكملو الدعاء وإلا نقصو على العملية..؟؟
تي ماو كان يحب يستجيب راهو إستجاب ..الزيادة علاش؟وإلا زعمة أسبوع شوية؟
باهي أنا توا قدامي حالتين:
- عباد كيف اللصقة يشدو ما يسيبوا :أمان.. أمان.. أمان.. أمان..حلنا المعابر
وإلا
-رب مريض بالنرجسية ويستلذ بالدعاء والتضرع وبآلام الأطفال في غزة وشاد صحيح باش ميحلش المعابر..
إلي نحب نقولو إلي الكثير من الناس علاقتهم بالآلهة ما تبعدش برشة على علاقتهم بعطار الحومة إلي مكردي عندو ، وبعرفهم في العمل.. علاقة تقوم على الخوف و المنفعة المتبادلة:نعطيك دعاء وتعطيني فتح معابر !
نعطي صدقة وتعطيني مكان في الفردوس..
ما نغزرش لجارتي وناخذ حور عين في الجنة...
عندما نتوقف عن جعل الدين مؤسسة بنكية يمكن أن نسثمر فيها اليوم ونجني الثمار غدا خلودا في الجنة..عندما نكف على إعتبار الدين بورصة للاوراق المالية تدفع فيها اليوم عشرة أوراق من فئة 10 حسنات تخذهم غدوة 1000 حسنة.. عندما نكف على طلب الحصول منها على قروض و صكوك غفران عندها فقط يمكن للمسلم أن يتصالح مع ذاته ومع آلهته..وعندها فقط تفتح المعابر بالارادة ودون بيع وشراء..

كلنا فنانون11

أخيرا عثرنا على المفتاح :زغرطو يا نساء

أخيرا انتصرنا ،أخيرا وجدنا المنفذ إلى التطور و الرقي ومنافسة الحضارة الغربية.أخيرا وجدنا مفتاح النهضة التي طالما بحث عن اسبابها العديد من المفكرين و الفلاسفة وعلماء الاجتماع في حين أن أسباب الحضارة موجودة على مرمى حجر .أمام أعيننا ولكن أكثر الناس لا يبصرون..إنها تكمن في شيئين :
1-الدعاء:
منذ أسبوع تقريبا قرأت خبرا مفاده أنه وقع تخصيص أسبوع للدعاء لفتح المعابر إلى غزة!!!!! أسبوع كامل ..يوم لا يكفي لنصل بالدعاء إلى المبتغى..
يجب أن نلح في الطلب ليقبل الدعاء ..وأي دعاء؟ دعاء لفتح المعابر إلى غزة لايصال الغذاء والدواء إلى الأطفال !..هل قبل الدعاء؟منطقيا، لا! إذ لو قبل الدعاء لفتحت المعابر!
كيف يمكن لالاه رحيم أن لا يقبل الدعاء بفتح المعابر؟ويترك الأطفال والنساء والشيوخ تحت رحمة جلعاط شاليط ؟؟ ربما أسبوع لا يكفي؟

2-تطبيق الشريعة المحمدية:
أخيرا وفي بلاد إسلامية تمتلك القنبلة النووية وقع الاتفاق على تطبيق الشريعة الاسلامية..قلت في نفسي أخيرا وجدنا الباب الذي سنخرج عبره من حالة التخلف ! لست أدري لماذا يصر البعض على نعتنا بالتخلف؟مع أننا أصحاب حضارة وأننا خير أمة أخرجت للناس!! ليعلم العالم اننا قادمون من وادى سوات بالتحديد وأن حضارتنا ستعود عبر قص يد هذا ورجم تلك وجلد ذاك ونكون بذلك طبقنا الحدود وضمنا مفتاح التقدم والديمقراطية..قلت الديمقراطية؟ اوه! استغفر الله إن الديمقراطية كفر و هي من بدع الغرب كما قال علي بلحاج وأن الانتخابات التي ستقوده إلى الحكم ستكون الأخيرة!!
إن هذا الغرب لا يرى،أو لا يريد أن يرى ما حققناه في السودان حين طبقنا الشريعة..لقد كنا على ابواب الخروج من بوتقة التخلف عندما قطع حسن الترابي 96 يد !!(منظمة العفو الدولية -أفريل 1986) غير أن الغرب تآمر علينا خوفا منا..أنه يعلم أن مصدر قوتنا تكمن في تطبيق الحدود ولذلك فهو يفعل كل ما في وسعه ليصدنا عن الدين ألم ترى ماذا فعلوا بافغانستان؟
لا! لا مصالح إستراتيجية ولا أنابيب نفط ولا هم يحزنون.. انهم يخافون من الاسلام لا غير..
لكن ليعلم الكفار انه لن يهدأ لنا بال قبل أن نطبق ما أنزل الرحمن ونقتص ممن خالف الايمان ونزف بشرى لاخواننا في الدين أنه في أجل أقصاه 3 أشهر سيقع تطبيق الشريعة في الصومال تحت رعاية المحاكم الاسلامية
المدعومة خليجيا..اللهم أنغمت فزد

كلنا فنانون10

الطيب صالح يرحل مهاجرا في الشمال

الطيب صالح كان يرى في جائزة نوبل يانصيب (الجزيرة نت-أرشيف) توفي الأديب والروائي السوداني الطيب صالح اليوم الأربعاء بالعاصمة البريطانية لندن عن عمر يقترب من الثمانين عاما. وخلف الأديب الراحل ثروة أدبية زاخرة تضم عددا كبيرا من الروايات أكثرها شهرة "موسم الهجرة إلى الشمال" التي نالت شهرتها من كونها أولى الروايات التي تناولت بشكل فني راق الصدام بين الحضارات وموقف إنسان العالم الثالث ورؤيته للعالم الأول المتقدم. وبدأ الأديب الراحل الكتابة منذ أواخر الخمسينيات من القرن الماضي ومن بين أعماله أيضا "ضو البيت" و"عرس الزين" و"مريود" و"دومة ود حامد" و"منسى" و"بندر شاه". وتعد روايته موسم الهجرة إلى الشمال" في صدارة الأعمال الأدبية الذائعة الصيت في الشرق والغرب، وقد نشرت لأول مرة في أواخر الستينيات في بيروت وتم تتويجه "عبقري الأدب العربي". وفي عام 2002 تم اختيار الرواية ضمن أفضل مائة رواية في التاريخ الإنساني وفق قرار اتخذه مائة من كبار الكتّاب الذين ينتمون إلى 54 دولة، وفي مارس/آذار 2007 مُنح الطيب صالح جائزة ملتقى القاهرة للإبداع الروائي. يانصيب نوبل وقبل رحيله بنحو شهرين كانت مجموعة من المؤسسات الثقافية في الخرطوم بينها اتحاد الكتاب السودانيين ومركز عبد الكريم ميرغني الثقافي قد بعثت برسالة إلى الأكاديمية السويدية ترشح صالح لنيل جائزة نوبل. وأكدت هذه الهيئات في خطابها أن أعماله والترجمات الكثيرة التي حظيت بها تدل على عمقها وأهميتها ليس عربياً فقط وإنما عالمياً. لكن الأديب الراحل لم يكن مهتماً بأمر الجائزة، فقد أشار إلى أنه لا يشغل نفسه بالجائزة، وأشار في نفس الوقت إلى أن في العالم عشرات الكتّاب الكبار الذين يستحقون نوبل، وبعضهم في العالم العربي لم يمنحوا هذه الجائزة التي شبهها باليانصيب. من السودان إلى العالم ولد الطيب صالح عام 1929 في إقليم مروى شمالي السودان قرب قرية دبة الفقراء وهي إحدى قرى قبيلة الركابية التي ينتمي إليها وأمضى فيها مطلع حياته وطفولته فيها. وانتقل الطيب بعد ذلك إلى الخرطوم لإكمال دراسته فحصل على درجة البكالوريوس في العلوم بجامعة الخرطوم، لكنه كان مسكونا بالهجرة إلى الشمال فسافر إلى بريطانيا ليواصل دراسته مغيرا تخصصه هذه المرة من العلوم إلى الشؤون الدولية. عمل الطيب صالح لسنوات طويلة من حياته في القسم العربي لهيئة الإذاعة البريطانية" بي بي سي" وترقى بها حتى وصل إلى منصب مدير قسم الدراما. وعاد صالح إلى السودان بعد استقالته من بي بي سي حيث عمل لفترة في الإذاعة السودانية, ثم انتقل إلى دولة قطر حيث عمل في وزارة الإعلام، لينتقل بعد ذلك للعمل مديراً إقليمياً بمنظمة اليونيسكو في باريس, وعمل ممثلاً لهذه المنظمة.

المصدر:

الجزيرة

كلنا فنانون9

كلنا فنانون8

كم الساعة لديك؟ أو كم ساعة لديك

من وحي تدوينة مارطو و هديتي إليه إلى الفررر

ساعة حائط:الوقت لم يخترق جدار الصوت

ساعة يد: طلب الوقت يدها ..بعد أربعة وعشرون ساعة تزوجت و ظل الزمن وحيدا..

ساعة منبهة: " انبّهه/لا انبهُهُ، انبهه/لا انبهه، انبهه/لا انبهه":عند رأس الساعة ضربت المطرقة الصغيرة على رأس الساعة : فررررررر :-))

ساعة لقيس دقات القلب : تضحك من سرعة دقات قلب الطبيب كلما إقترب وقت دفع اجرته

ساعة سلفادور دالي: تحولت عقاربها إلى شوارب لفت إلى الأعلى


ساعة الغطس :اني أتنفس وسط الماء إنه يغرق يغرق يغرق..(الماء يغرق)

ساعة عادية: نورمااااال

ساعة يوم القيامة: أصبحت انتيك (عتيقة) ولم يأت منتصف النهار

ساعة رأسمالي: الساعة الآن الواحدة إلا خمس دولارات

ساعة شيوعي: لا فرق بين عقاربها، كلها متساوية في الطول

ساعة يمينية :تدور عقاربها عكس إتجاه عقارب الساعة أي عكس ذاتها

ساعة فنان: تحولت عقاربها إلى فرشاة لرسم الزمن

ساعة لاعب كرة قدم: بعد 45 دقيقة يحل منتصف النهار وفي 90 دقيقة يذهب لينام (في بعض الأحيان يسهر إلى ما بعد منتصف الليل في الوقت الضائع)

ساعة فلاح: تمطر ،لا تمطر،تمطر ،لا تمطر،تمطر ،لا تمطر،

ساعة مدون: كل عقرب تسير في إتجاه معاكس واحدة في إتجاه اليمين والأخرى في إتجاه اليسار واتجاه ثالث لعقرب الثواني ؛-)

ساعة عمار: كلما تلتقي عقرب الساعات بعقرب الدقائق يقص عنق مدونة ارادت التقدم بالزمن

ساعة إمرأة فيمينيست:تتبادل العقارب الأدوار وتتحرر عقرب الساعات من تبعيتها لعقرب الدقائق..:الساعة الآن: دقيقة وسبعة ساعات!

ساعة رجل فضاء: أففف! كرهت الأرض ومن عليها

ساعة بن لادن: ساعة رملية عقاربها سامة ..

ساعة شارون: المستوطنون يعيشون في حالة موت سريري

ساعتي: حان الوقت لنشر ما كتبت.. ههههه

في الأزرق

تحت سماء زرقة.والشمس زارقة كنت نتمشي في نهج زرقون وقتلي عرضتني وحدة لابسة بالازرق..قلتها:سامحني موش إنت زرقاء اليمامة؟
قتلي تتبولد؟ تحب نعيطلك خويا يزرقلك عينيك؟ ما تعرفش إلي خويا باندي نهج زرقون؟ قلتلها فاش قام؟موش قرينا مع بعضنا؟ ياخي نسيت؟ قتلي : آه توا عرفتك ماتكون كان الرزقي! قلتلها صحيح.. قتلي: بلعمارة كنت تلبس منديلة زرقة كاروات كاروات..قلتلها تتذكر كيف نغنليك:الموج الازرق في عينيك..يناديني نحو الأعمق...ضحكت و قتلي: (بالفرنسي): بين سير! قتلي و أنت تتذكر كيفاش كنت تخاف من الزريقة كيف تجي الطبيبة متاع المدرسة..وترشقنا بالضحك..
نحن هكاكة و جانا واحد لابس دنغري أزرق غامق و راكب على موبيلات زرقة.. قاتلي وووه الزرقاوي جاء..قلتلها شكون الزرقاوي تي ماو مات في العراق؟؟!! قاتلي:تي لا، هذا خويا شهر الزرقاوي.. قلت في قلبي: ليلة زرقة (بثلاث نقاط)..قالي: تفضل ماهولابس؟هو قال لاباس وسنيه بانت .ما نعرفش علاش تذكرت البلو توث متع بورتابلويا ما يمشيش... قتلو لا باس ..كنا نقراو مع ،مع بعضنا في مدرسة نهج الحوت..قالي: شنوة؟ نهج الحوووت؟ اناهو حوت بابا ؟ من غير ما نشعر قتلو نهج الحوت الأزرق..قالي : تتضومر؟ تحب نخلي المادة مزرزقة بدمايتك؟ قتلو فاش قام .. ؟ ودرت باش نتزرزق و نمشي.. تلفتت زقاء اليمامة(وكان هذاكا اسمها) وقالت لخوها:بجاه لزرق ما تضربوش،راني نعرفو..على كلمة نعرفو..نسمع: زراااااق !! تلفت نلقى عينها زرقة..قلت يا ولا مصيبة زرقة حطيت روحي فيها..في رمشة عين تلمت حضبة وضوء أزرق يشعل ويطفى :با بو با بو با بو
حليت عينيا في السبيطار ونلقى يدي في يد مرا لابسة بالابيض فرحت..قاتلي ما تخافش ،ما تخافش أنا الدكتورة زينة زرق العيون

photo: ART.ticuler

متى نخرج من هاته الدائرة المغلقة ؟

كلنا فنانون 7

كلنا فنانون 6

يا أولادي قولولي شنوا الحب؟

شفت إلي الناس الكل تكتب على الحب و تبارك لبعضها قلت خليني نسألهم بلكشي يحكيو على تونس أخرى.. يا أولادي راني ما شفت كان الكره لابس قفازات و ملصق تبسيمة صفرة..
على أنه حب تحكيو؟
-إذا كان إستغلال الفتيات في المعامل التصبير و الصبرعلى الأجر الأدنى الضامن لاستنشاق .الهواء/ى
-إذا كان دموع أبو القاسم الشابي على الأوراق النقدية كيف تنتقل بغير وجه حق من جيب إلى آخرفي كل تقاطع للطرق
-إذا كان العلاقة المبهمة والغريبة التي تجمع كل تونسي بجسده
-إذا كان الصراع الأبدي بين البايع والشاري : في كم آلة وزن نثق؟
-إذا كان التزاحم أمام الحافلات لظفر بمكان للاقوى وليس للاضعف كما يجب أن يكون
-إذا كان الحب ينجم يأخذ شكل وردة بلاستيك مصنوعة في الصين
-إذا كان غزرة سائق التاكسي الحنينة كلما كانت الكورسة أقل من ألفين
-إذا كان صغارنا يشوفو مرة في العام، الدميات شرتلة و يشفوه كل يوم في حديثنا
-إذا كان شكاير الزبلة إلي تهبط تزغرط من الطابق الرابع
- إذا كان كلمة أرجع غدوة هي شعار الادارة
-إذا كان كلمة "سامحني" رزينة في أفامنا
-إذا كان الكلام الزايد إلي تسمعو في كل دورة هو الجارقون
-إذا كان قلوب أمهات تتحرق كلما يجي خبر ولدها إلي حرق
-إذا كان مقارنة بين حي النصر وحي هلال..


-إذا كان هذا الكل اسمو حب ما لا الكره شنوة؟

كلنا فنانون 5

تعقيبي: إلى عاشور الناجي دوما :-)

أردت تحيتك على انتقالك (أخيرا قلت في نفسي) إلى مواضيع أخرى فما راعني إلا و قد عدت وكالعادة إلى الدين!:-))
سوف اتجاوز هذه النقطة..وأقول أن المشكلة ليس في الدين في حد ذاته بل عندما يتجاوز المعتقد دائرة الخاص إلى دائرة العام المشترك أي أن يؤثر معتقدك في علاقة المواطنة التي يجب أن تربطني بك و باي فرد داخل المجتمع.. يخطيء من يعتقد أن المجتمعات الغربية حيث لا أحد يتجاوز القانون لا بهامر ولا حتى بدراجة قد تخلص من العامل الديني. و للذكر، فسوف يعقد في الاشهر القليلة القادمة هنا في هذه المدينة أكبر تظاهرة دينية للبروتاستون في اوروبا ..
ويمكن أن أضيف كمثال المجتمع الأمريكي المتدين إلى النخاع والذي عرف بعيد الحادي عشر من سبتمبر موجة تسونامي دينية توجت باعلان بوش العودة إلى الحروب الصليبية ..لكن في هاته المجتمعات يقع إحترام القانون بل أكاد لا أرى سوى القانون حكما في العلاقات الاجتماعية والفرق حسب اعتقادي بينا وبينهم هو أنه في الغرب لا أحد يعتدي عليك باسم معتقداته الدينية أو يملك حتى حق تصنيفك..

وبكل وضوح،أقول أن إقتلاع الدين من العقول أو بالاحرى من القلوب عملية لا جدوى منها ! فذلك عمل ذاتي يقوم به الفرد بناء على قناعات شخصية و نقد ذاتي و عذبات نفسية مر بها كل من تجرأ على رفض "حقائق في طبق"! و لم ار في حياتي من عدل عن دينه تبعا لنقاش أو مجادلة ..
لكن ما يمكن مناقشته هو تداخل الدوائر الخاصة بالعامة ..
أسمي دوائر عامة : المواطنة حيث نخضع كلنا إلى سلطة القانون وليس إلى سلطة دينية أو قبلية أوعائلية ..

كلنا فنانون 4

كلنا فنانون 3

يبدو لنا من الوهلة الأولى أننا أمام نفس التفاحة التي رأيناها يوم الثلاثاء ..ثم ما معنى "نفس" ؟ ألا يغير الزمن هذا المفهوم؟ ما هي علاقتنا بالزمن؟ثم زعمة إصدار حكم من خلال حاسة واحدة إلي هي حاسة البصر موش فيه تجني على تفاحتنا المسكينة إلي تقول يا أولادي راني تبدلت ونحن نقولو: لا!إنت شكلك الخارجي ما تبدلش وبالتالي إنت نفس التفاحة..
وهي تقول يا أولادي راهو عندكم خمسة وإلا ستة حواس علاش تحكم علي من خلال حاسة واحدة؟
زعمة موش على خاطر الانسان يحب إصدار الاحكام الساهلة والسريعة وإلي ما فيهاش تخديم للعقل؟ باهي،و بقية الحواس اش باش نعملو بيهم؟ ..التجربة ستستمر و أرجو أن لا تكفوا عن التعليق..

كلنا فنانون 2

بوس اللفعة وإلا طيح في بير !!هل من خيار ثالث؟؟

إنقسم المدونون إلى قسمين:قسم تحالف مع الرب ضد الفكرة وقسم تحالف مع الفكرة ضد الرب !والتقسيم هذا في حد ذاتو موش مشكلة بل نجم نقول إلي هو أمر طبيعي يصير حتى في أحسن العائلات..
لكن إلي موش طبيعي بالكل إعتبار الكلام العادم مقبول كيف يجي من أشخاص معينين وغير مقبول كيف يجي من أشخاص اخرين وهذا تملق تدويني لا يمكن قبوله !
وباش نكون واضح :نقول لجماعة مدونة الطابور الخامس عشر راهو موش معقول وموش مقبول تخصيص مدونة لرجم المدونين ونعتهم بالغباء ..و الوقوف إلى جانب جانب الفلسطينين من عدمه لا يمكن في أي حال من الأحوال أنو يكون فرصة لانشاء مدونة/قنبلة موقوته مهمتها التصنيف والتجليف ونسف البلوغسفير!!
وفي نفس الوقت نقول موش فقط لبيغ وانما لاي شخص إستعمل كلام عادم بمعنى انتهى تاريخ صلوحيتو باش يرد على جماعة التصنيف، نقلو راهو الكلام الخايب يبقى خايب حتى في إطار الدفاع على النفس..و إلي نفسو غالية ما يدافعش عليها بكلام هابط وكيما سبق وقلت لبيغ انو غالط نعاود نقول مرة أخرى وما نيش باش نتراجع وإلا باش نشجعو :الكلام الهابط ما يستدعي كان الكلام الهابط و باش ندخلو بكلنا في دائرة مفرغة لا يمكن الخروج منها وكيما يقول المثل التونسي:طاح القدر وفا التدوين!!
لقد سبق وأن تحاورت مع بيغ في/على حرب غزة بالذات وكان حوار في كنف الاحترام المتبادل رغم اختلافي معه وأرجو أن يستمر ذلك مع كل المدونين!
لذا ن نقول إلى راني لا نحب نبوس اللفعة ولا نحب نطيح في بير فقط نحب نرتقيو بكلنا بمستوى هذا الفضاء ..الفضاء الوحيد الحر المتبقي!!

لنقاطع الجرايد البودورو ولننشر الوعي بضرورة مقاطعتها

تخلف و همجية صحفية فاتت كل الحدود..ولو أني نشك إلى الناس هذي صحفيين بالحق..
على المواطن الكف عن شراء مثل هذا الصحف..المواطن هو إلي يفرض المستوى الادنى على الجريدة على خاطر ما فمة حتى جريدة تنجم تواصل الصدور من غير المبلغ البسيط إلي يدفعو المواطن ..
المواطن إلي يدفع 500 مليم لقاء كلام بذيء و أكثر من 50 ٪ من صفحات الجريدة إشهار والباقي الكل قص و لصق.. عليه أن يعي أنه ب-500 مليم متاعو ينجم يوقف صدور مثل هاته الجرايد إلي تلحق العار بالصحافة ككل..
لنقاطع الجرايد البودورو ولننشر الوعي بضرورة مقاطعتها..

كلنا فنانون! دعوة للمشاركة

mardi 10/02/2008
هي دعوة لكم لابداء أول فكرة تخطر ببالكم حين مشاهدة الصورة..عبروا بكل عفوية و التجربة باش تدوم بضعة أيام
..Photo:ART.ticuler

Ceci est une pipe

Photo et Pipe :ART.ticuler ;-)

الموزايك..هوايتي المفضلة...بعض الأعمال

.
الموزايك فن جميل وهواية في نفس الوقت..هذه جملة من الأعمال إلي قمت بها في السنوات الفارطة كهواية أولا وفي بعض الاحيان في شكل تعاقدات ..
فن الموزايك هو فن يخولك إضافة إلى التعامل مع الألوان ،الغوص في العمل الفني،بمعنى عدم الاكتفاء بالسطح كالرسم مثلا ..هو رسم ذو ثلاث أبعاد فعلية وليس وهمية..هاته الرغبة في" الغوص" نتذكرها ملي أنا صغير وقتلي كنت نتفرج في تصاور كتاب ..ونقول خسارة ما نجمش نعرف شنوا موجود وراء الشباك مثلا وإلا الباب..
"مسك" الاشياء إلي عندها ثلاثة أبعاد هو إنتقال من الجمال السطحي (موش تنقيص من قيمتو كيف نقول سطحي) إلى الجمال الملموس أي إنتقال من المثالي أو الوهمي إلى الجمال الواقعي الملموس ..
فكرة الجمال إلي نشوفوه في كتاب ومن بعد نسكرو الكتاب و نرجعو لواقعنا هي الفكرة إلي كانت ديمة موش عاجبتني وديمة نقول علاش موش الجمال حاجة ملموسة وتنجم تمسها ؟ علاش المثالي كان في الخيال والواقع ديمة خايب؟
علاش نفصلو ديمة الصورة/الجمال في إطار خشبي عن الواقع؟ (ساعة ساعة تلقى إطار أكبر من التصويرة:-))
ألا يترجم هذا إنفصام ما في تعاملنا مع الواقع؟؟ مجرد سؤال!

الدفعة الثانية من صور المدونين

شكرا لتفاعلكم الايجابي مع الفكرة..أنتم مدعون أيضا إلى الرسم مهما كانت مهاراتكم الفنية في الرسم..ومن ثم , لم لا فتح نقاش حول فكرة التواصل الفكري( و غير الفكري :-)...إذ انني أعتقد أن ما نقوله وما يصل إلى الآخر يختلفان إختلاف كلي وهو ما يفسر ، حسب رأي، حدة الصراعات في البلوغسفير ..لا أقول اننا نتفق على كل شي وأن المشكل في التواصل..لا!
أقول أن الاختلاف موجود وهذا شيء إيجابي أما التخوين والسب وتبادل الشتائم فهذا مرده، وأرجو أن أكون على صواب، إلى أننا نتصور الآخر كما تخيلتهم ورسمتهم أنا..أي 100% خارج الحقيقة والواقع.. هههه
ربما تأتي دفعة ثالثة ..