إنقسم المدونون إلى قسمين:قسم تحالف مع الرب ضد الفكرة وقسم تحالف مع الفكرة ضد الرب !والتقسيم هذا في حد ذاتو موش مشكلة بل نجم نقول إلي هو أمر طبيعي يصير حتى في أحسن العائلات..
لكن إلي موش طبيعي بالكل إعتبار الكلام العادم مقبول كيف يجي من أشخاص معينين وغير مقبول كيف يجي من أشخاص اخرين وهذا تملق تدويني لا يمكن قبوله !
وباش نكون واضح :نقول لجماعة مدونة الطابور الخامس عشر راهو موش معقول وموش مقبول تخصيص مدونة لرجم المدونين ونعتهم بالغباء ..و الوقوف إلى جانب جانب الفلسطينين من عدمه لا يمكن في أي حال من الأحوال أنو يكون فرصة لانشاء مدونة/قنبلة موقوته مهمتها التصنيف والتجليف ونسف البلوغسفير!!
وفي نفس الوقت نقول موش فقط لبيغ وانما لاي شخص إستعمل كلام عادم بمعنى انتهى تاريخ صلوحيتو باش يرد على جماعة التصنيف، نقلو راهو الكلام الخايب يبقى خايب حتى في إطار الدفاع على النفس..و إلي نفسو غالية ما يدافعش عليها بكلام هابط وكيما سبق وقلت لبيغ انو غالط نعاود نقول مرة أخرى وما نيش باش نتراجع وإلا باش نشجعو :الكلام الهابط ما يستدعي كان الكلام الهابط و باش ندخلو بكلنا في دائرة مفرغة لا يمكن الخروج منها وكيما يقول المثل التونسي:طاح القدر وفا التدوين!!
لقد سبق وأن تحاورت مع بيغ في/على حرب غزة بالذات وكان حوار في كنف الاحترام المتبادل رغم اختلافي معه وأرجو أن يستمر ذلك مع كل المدونين!
لذا ن نقول إلى راني لا نحب نبوس اللفعة ولا نحب نطيح في بير فقط نحب نرتقيو بكلنا بمستوى هذا الفضاء ..الفضاء الوحيد الحر المتبقي!!
14 commentaires:
و موش يمكن يكون الهدف أوّلا و أخيرا هو القضاء على الفضاء الحر الوحيد المتبقي لأنه أصبح مصدر قلق ؟
تقول انت يزينا من نظرية المؤامرة ؟
أما بربي عندي سؤال موش ليك شخصيا أما لكل واحد يتعدى من هنا
هل الي يكتب باسم مستعار عنده مصداقية يهاجم صحف بسبب مقالات مجهولة ؟
هل الي يسب العباد في شخصهم أو عرضهم عنده مصداقية كيف ينتقد صحف أو مدونات تنهش أعراض الناس ؟
هل الي يقول لك اسكت عنده مصداقية يتكلم على حرية التعبير ؟
هل الي يقبل بل و يساند و يصفق لوصف قحب مريّش عنده مصداقية يتقلّق من كلمة ملهط ؟
هل يمكن إفادة حشرة حقيرة غبية شبه مثقفة كيفي على أي أساس تتبنا مواقفكم و آرائكم ؟ حسب المبادئ و القيم و العقل أو حسب العاطفة و الحساسيات و الكليكات ؟
واحد حل مدونة باسم امرا ، نصب أو نصبو رواحهم محاكم تفتيش ، متهم و قاضي و جلاد و ايجا دافع على روحك بالسيف نحاكموك محاكمة عادلة و نعدموك بربي سؤال آخر ميسالش هل الوخيان و الوخيات الي تقلقوا من كلمة ملهط ، زعمة صدفة يكونو هوما انفسهم الي كشخوا لكلمة قملة ؟ عالأقل الملهط عبد، أما القملة اقل من تفشة ، و سب شخص موش فكرة ، علاش؟ تعرف يا أرتكلي تحب حاجة تخمج ؟ بلاد كاملة أو فضاء تدويني ، سيب فيه الخوانجية ، و اجبد كرسي و تفرج بشماته ، ناس تنفي انسانيتك من أساسها و تنادي بقتلك قبلتوهم و من بعد جايين باهتين علاش بيغ رد عليهم بنفس لغتهم ؟ موش هذا دليل آخر على أن الي قلته بخصوص التناقض و آثر الدين المدمرة للعقل العربي الي ما ينجم يرى كان حقيقته هو ؟
و زيد احنا صرفنا صرفنا ، خل نجاوب بالمسبّق ، الي قالوا عاشور يسب في معتقدات الناس ،
المعتقد ماو قلنا فكرة ، قابلة انها تتسب ، هي مقدسة عندك حاجة تخصك ، موش مبرر تسب انسان لأنه انتقد لك معتقدك ،
سب له فكرته ، معتقده ، قول الالحاد قمة البهامة و الحمق ، حقك ، أما موش سبب تسب انسان في شخصه ، لأنه هو ما جبدكش شخصيا ،
إذا ما تجاوزناش ها المرحلة الطفولية هاذي ،
زايد ،
@3achour
ما فماش تجمع بشري يلم أكثر من واحد ،نجح في التعايش بدون قواعد مؤطرة و مقننة للعلاقات سواء كانت قواعد عرفية أو مكتوبة وما فمة حتى واحد إحترم القواعد هذي لو كان مافماش قوة رادعة مادية أو معنوية موجودة حتى ولو لم يقع استعمالها ..
الفضاء التدويني هو تجمع بشري إفتراضي، كيفو كيف أي تجمع، في حاجة إلى قواعد تحدد سلوك كل مدون ومجال التعبير ..كيما وقع مع المدونة الجماعية إلي فيها قواعد تحدد كيفية المشاركة..
فيما يخص الجرايد بودرو يظهرلي ما يختلفوش إثنين إلي نوعية ها الجرايد يلزم مقاطعتها على الأقل لانها نشرت أرتيكل تتهم فيه الناس و بدون دليل إضافة لكونو مجهول المصدر !
بخصوص المدونين إلي عندهم توجهات إسلامية :نقول إلي يلزمهم يكفو عن النظر إلى العالم من خلال ثقب الأبرة متاعهم و على المدونين إلي عندهم اتجاهات فكرية مخالفة يلزمهم يفرق زادة مابين المعتقد الديني متع العباد حتى ولو تكون بقرة وما بين تأثير ذلك المعتقد على ما يربطني به كمواطن أولا وأساسا..وهذا إلي يلزم التركيز عليه بالطبيعة حسب رأيي
كلامك معقول جدا يا ارتيكولي، و نضم صوتي لصوتك. و حتي كانوا هوما اسبق بالاهانة، المفروض الواحد ما ينزلقش لها الحوارات.
وقتها بش نهبطو في بير لا قرار له، وكل واحد بش يحاول يبهر لاخر بمهاراتو الشتيمية.
شكرا بنت عايلة على المرور...بالفعل المهارات الشتمية مافماش ما أسهل منها ..والبلوغسفير هذا علينا حمايتو من التجاوزات مهما كان مصدرها !
آرتكلي، ماهي دلائلك على أننا ن"تحالف مع الرب ضد الفكرة" أو لنسمي الأمور بأسمائها، ماهي دلائلك على أننا "إسلاميون" أو "خوانجية"؟ أم فقط صدقت ما قالوه! يبدو أن الغباء داء معدي في البلوغوسفير!
تونس دينها الرسمى هو الاسلام وهذا بالمناسبة مذكور فى الفصل الاول متاع الدستور...والدستور ماجاشى من فراغ..جا باعتبارات الجغرافيا والتاريخ والسياسة والمصالح الخ...اليوما هو كى مايعجبوش الدين الرسمى للدولة متاعى..عليه اننو يرضى بدور ثانوى فى اللعبة..يعنى يرضى بالقسم الرابع فى البطولة..واذا يحب روحو ينافس عاللقب يرضى بقانون البلاد..يعنى الدستور..والدستور مكسب عزيز وغالى..عندى وعند لعباد الكل ...انا ماطلبتشى اننا نمشيو نصليو الجمعة فى نوتردام..لكن فى جامع الزيتونة انا حر..هاذيا بلادى وحامينى دستورها...انتى تعتبر اننى متخلف والاسلام هو سبب التخلف...ماعندك ماتخسر..سيب بلاد الناس..واذا تحب تعيش فيها التزم بدستورها...لكن برا نقولو انتى تحب تعيش وتتملح من الدستور...هنا يا فرار نقوللك ستوب..هنا انتى صرت مقاتل..ومتمرد ضد شعب كامل اختار نوعية بلادو...اليوما انتى كى تشد كلافييه وتحب تقصفلى بلادى بحروفها وتقصف معتقد الشعب..حضر روحك لكل المفاجاءات...مانقدرش نتكلم مع زعماء التمرد فى بلادى بلوغة مهذبة..والحرب النظيفة حاجة مستبعدة..انتوما تقصفو..احنا نقصفو وليوم يبعثون
أرتيكيلى..كلامى ليس موجها لك..واردت من خلاله الهروب من المجادلات الفكرية اللتى لا تختلف فى شيء عن حوار الصم..واللف والدوران لن يمنعنا من الوقوف امام الواقع ولو بعد حين..فلنحاول البدء من الاخر كما يقول مثل مصري
يعني كي يبدى الواحد يحكي بجربوعستان و يصنّف في العباد على كيفو و بمنطق عادم زادة ما تقلقتش إنت يا أرتيكيلي، و ما سمعناكش تكلّمت على كل حال
و كيف جاء شكون نعتهم بأغبياء تقلّقت
و شبيكم تحكيولنا على علاقاتكم الشخصية، قالوا أنا حكيت معاه، و لاخر قال أنا نعرفو راهو ناس ملاح، شدخّل هذا في هذا، أحنا نحكمو على التعاليق و على الكلام في المدونات
فمّا برشة كلانيزم في المدونات التونسية، و ما فمّاش حوار، و مستحيل كان يولي فمّا حوار، كي أحنا مش نقعدو المسكيو، و نغطّيو، و نكذبو على بعضنا و على رواحنا زادة
و مدونة الطابور جات باش تعدل الكفّة شويّة، مرحبا بيها
يا خويا اش ما جيبك لربطنا..تونس ربطنا واحنا احرار فيه..تحب تفرض علينا رايك ولا اريكم الا ما ارى..تعرفنا ما حناش ساهلين..اذا انتى كملحد تحب تجى لسوسة بمريول الترجى ..لا محالة انتى حر مانمنعوكش..لكن على مسؤوليتك...تتحمل التبعات..ماننجموشى نعملو عليك عساس...زاده أحنا متفقين اننا نلعب كورة بالاديداس فى رجلينا...انتى تحب تلعب حافى..كى صوابعك يتفشخو ما تقومشى تصيح وتعيط...تونس بلاد دينها الاسلام ولغتها العربية احب من احب وكره من كره...قلتلى لا انا ملحد وما يعجبنيش الاسلام...شد طاولة فى تركينة واقعد ما تخاف من حد...لكن قعدة فى التصديرة مضمض منها...تحب تفسد العرس..تى ماك تعرف نفشخوك..مانحبوشى شكون يفسدلنا فرحنا...والدستور معانا والقانون معانا والتيرران معانا والفيراج معانا والجيران معانا والتاريخ معانا...كيفاش قتلى نحب نعبر...ايه ما منعك حد لكن نذكروك اننا عندنا قوانين والقوانبن فيها ليميت والليميت اذا تحب تكسرها..احنا نكسروك...عندك حل واحد ..انك تعيش كلاندستان..فى النوار...وراء كمبيوتر فى اوروبا وللا فى دارك وتقعد تجيب وتجلب..بالطريقة هاذى تنجم تعيش..لكن كى نقولولك طابور خامس...ابلع لسانك واسكت وما تزيد حتى كلمة ..لانو بالررسمى هاكا هو تصنيفك...كيفاش قتلى خوانجى...لحد غادى عاد ما نسمحولكشى تتدخل فينا...نوعية الاسلام اللى نحبو نطبقوه فى تونس هاذيكا حاجة تخصنا احنا اولاد البلاد...عندنا برلمان وعندنا مجلس استشارى وعندنا صحافة وطنية واذاعات وتلافز...وننجمو نقعدو مع بعضنا ونتحاورو ونشوفو اما هو الاسلام اللى حاجتنا بيه...اخوانى ..سلفى..معتدل..زيتونى..ازهرى..انتى ما عندك ما دخخلك...ابقى متفرج ما دامها اختيارات الشعب ما تعجبكش...والمؤسف بالنسبة ليك طبعا هو اننى هالاختيارات وقع الاتفاق عليها ..موش اليوما وللا امس...من بداية الاستقلال اذا موش قبل..لكن من الاستقلال وللات حاجة رسمية وغير قابلة للنقاش او المناقشة
@ soufien
سبق وقتلك نقص من الانفعال إلي يطغى للاسف على كل تعاليقك..
كيف قلت حكيت معاه موش معناها حكيت معاه في بار علي ورق راسي راسو!! تناقشنا في المدونة وكان بالامكان قراءة النقاش إلي صار وإلا تحب تفهمني إلي إنت ما تفلت حتى تدوينة؟
ويظهرلي كلامي واضح للاطراف الزوز ..واضح جدا زادا..
يبدو أن الغباء داء معدي في البلوغوسفير
!!!!!!!!
لا يا أرتيكيلي، مدونة الطابور جات توّة توّة، ما عندهاش برشة، قبلها كان فمّا برشة غباء في البلوقوسفار، لكن ما شفناش شكون تشكّى، كي مدونة الطابور تكلّمت، لعباد الكل تشكّات
شمعناها غباء يا أرتيكيلي، يلزمنا نتفاهمو علاها الكلمة هاذي الساعة
؟
@ soufiene
نتمنى تكون قريت ردي لعاشور (الفوق) ..وكلامك يصب تقريبا في إتجاه كلامي ،لابد من وضع "قواعد" للتدوين يتفقوا عليها الناس الكل..
-التركيز على الافكار و وتحديد موقف من بقية المواقف إلي يقع التصريح بها صراحة وليس تخمينا دون المس من الشخص ذاتو..
-لا أحد مدعو لتقديس الرأي المخالف ولا أيضا إلى "تمزبيلو"
Enregistrer un commentaire