في الكلام الزايد ومشتقاتو

يظهرلي ما يختلفوش إثنين في كونو الكلام الزايد حاجة زايدة ..ولا يزيد ولا ينقص من قوة حجة مولاه..باهي الكلام هذا حلو لكن خلينا نفركو شوية الرمانة ونفهمو الحكاية بشكل أحسن
أنا نرفض الكلام الزايد موش على خاطر زايد وإلا خاطرو ناقص لكن لاعتبارات جمالية بحتة! بعبارة أخرى الكلام زايد نرفضو موش لاعتبارات أخلاقوية ..وانما لانو كلام يمس من الذوق السليم ..
باهي شنوة الكلام الزايد؟
الأغلبية تعتقد انو الكلام الزايد هو ما يذكر فيه الأعضاء التناسلية إلي هي في حد ذاتها لا تعني لي شيئا غير أخلاقي بل كلها أعضاء خلقها رب العالمين !
الكلام الزايد، كيما أنا نفهمو، هو سب خصمك ونعتو بجميع الأوصاف فقط لانو يخالفك في الرأي ! : طابور خامس، خرافيش، ذيل الكلب، الأغبياء ...والقائمة تطول..
الكلام الزايد عندي أنا هو كيف الواحد يسيّب الموضوع متع التدوينة و يكبّش فيك ..
الكلام الزايد هو تعبير على نقص وعدم نضج في الشخصية ..
الكلام الزايد هو إلي يرى في الكلام الزايد بعد اخلاقوي وينسى إلي الكلام الزايد في غالبو هو تعبير على كبت وأمراض نفسية ..ناتجة بالاساس على أخلقة التفكير عوض عقلنته
الناس إلي تستعمل الكلام الزايد في بالها باش يمس الطرف الآخر في الصميم ! لكن الواقع هو انو إلي يستعمل مثل هذا الكلام هو أكثر الناس حساسية وعرضة للرد عليه بنفس الأسلوب !
لذلك أنا لا أتوانى في الرد على أي كلام بذيء بمثله كيف توصل المعالق للخالق !
يكفي أن نقوم بجرد للتدوينات باش نشوفو إلي شكون يبدأ دائما بالسب والشتم..العملية ساهلة برشة ..
هنا نحب نلاحظ حاجة, إلي المدونين المحسوبين على اليسار كيف ينقدوا ظاهرة وإلا طريقة تفكير( وهذا من حقهم) يعتبروه في الشق المقابل :تهجم على المقدسات !!! لكن كيف يتهجموا هوما على العقل والذوق السليم وإلي أنا اعتبرو تهجم على مقدساتي ! علاش حتى واحد مقال يزيو من الكلام الزايد؟؟ وهنا نقصد في الخوانجية إلي في حالة سراح!!
أعتقد أن الحديث في الكلام الزايد لازمو شوية تروشيك بدون قوالب جاهزة وكلام زايد