samedi 6 mars 2010

نضال أيام زمان 3


ماهو لباس يا طيب سألو عم التهامي؟ قالوا حاشتي بحمادي.. لازم اجي معايا للمركز ولد بنتي شدوه البوليسية بحذا راس الطابية ومانيش عارف لواش شدوه..فينو حمادي ؟..حمادي فينو..؟

جاوبو الحاج عبد الله قالو حمادي كان هوني وروح للدار منبوز منا ...

بدا عم الطيب جملة وكملها في فم الباب: باقي ماكمش باش تسيبو الراجل ..هاني إستحقيتلو توا ..ربي يهديكم .. وخرج شد ثنية الحومة خلط عليه عم التهامي وقال للحاج : خلص القهوة وموعدنا طرح الشكبة في العشية...

بالازمة لاني مخلصها قالو الحاج .. طبق إشتراكيتك على روحك قبل ... تموت وتخليهم قالو عم التهامي في قالب ضحكة وخرج يجري..

في فم النهج تلقاو الجماعة الكل.. عم الطيب وعم التهامي و عم حمادي طالع يقضي وفي يدو قفة. جرالو عم الطيب وقالو يا حمادي ولد بنتي تشد في المركز وتعمل مزية تمشي معاي نشوفو الحكاية شنية..

عم حمادي معروف عليه انو عمرو ما رد واحد إذا كان باستطاعتو .. ربما يحاول بسلوكو هذا يعطي صورة أخرى على روحو ويفسخ من مخاخ الناس فكرة البوليس مكسر.. وإلا ربما طريقة من الطرق باش يكفر بها على ذنوبو كيف كان بولس صحيح موش كيما تاوا مكسر .. لكن بالرغم من ذلك عم حمادي حافظ على علاقاتو القديمة سواء في المركز متع الحومة أو في المنطقة متع باب بحر..

قالوا عندكش فكرة فين شدوه ؟ جاوبو عم طيب قالو حسب كلام امو خرج الصباح مشى يقرا في الجامعة و صاحبو عمل تليفون قال ايلي هو شدوه البوليسية ..وما زاد قال شي على هذاكا.

كيف وصلو للباب متع المركز قاللهم إستناوني هوني هاني جيت ودخل ...



يتبع كان حب رئيس المركز

0 commentaires:

Enregistrer un commentaire