نضال أيام زمان 4

دخل عم حمادي وقعد عم الطيب مع عم التهامي يستناو فيه في المدخل متع مركز الحومة ...

تفضلوا اقعدوا .قاللهم عون أمن موجود غادي .. كان فمة بنك لوح مغلف بالسكاي لونو مارون وفي الشوكة متع البنك خارج شوية موس من تحت السكاي.. تقولش عليه مصارن خارجين من تحت الجلد ...

قعدو الجماعة يستناو ومنها قام عم التهامي كاينو شكون عيطلو ومشى مباشرة إلى الجهة المقابلة فين فمة كواترو كبير قد ربي وعبادو معلق فيه البيان العالمي لحقوق الانسان .. عم الطيب لاهي يغزر من الشيرة إلي دخل منها عم حمادي.. وعم التهامي يقرا ويتبنِّن ..

تعدات نصف ساعة تقريبا .. عم التهامي كمل قرا الكواترو وعم حمادي ما ضهرش ..عم الطيب يمشي ويجي في زوز ميترو كيف الدجاجة إلي حارقتها عظمتها .. وعلى غير رادة دخلوا زوز بوليسية مدخلين راجل ومرا وعياط وصايح قبب قبب .. الراجل يصيح ويقول: خاطيني! راني خاطيني! هي دخلت في كرهبتي من تالي .. والمرا تعيط و تقول : البلاد هذي فيها حاكم ماهيش مسيبة .. البلاد هذي تحمي نساها .. تسب فيا وتتهجم عليا يا.. في بالك البلاد على قرنقك (ثلاث نقاط) .. تي كيفاش ندخل فيك بكرهبتي وكرهبتي ساكتة؟ قال الرجل إلي يديه في المونوت .. عم حمادي عاتي بظهرو للكواترو وباهت في عجب ربي وعم الطيب إنشغالو بولد بنتو ما خالاشي يستوعب آش يصير قدامو ..

دخلو الناس الكل ورجع السكوت من جدي في المدخل متع المركز... ساعة، ساعة، يخرج صوت من الداخل مكتوم كاينو سبان أو كلام زايد .. زايد باش نعاودو نقولوه..

ثلاث أرباع الساعة فاتو وعم حمادي ريحتو مافماش .. ومنها حس صباط متع واحد خارج وحدة، وحدة... مستحيل يكون عم حمادي .. المشية من الإيقاع متاعها ما تنجم تكون كان متع مرا..الرجال ما عندهومش إيقاع كيما النساء .. انجم حتى إنقول إلي ما عندهمش إيقاع جملة وحدة... بدا الايقاع يقرب وبدا عم الطيب يتهيأ للوقوف حتى لوكان موش راجل إلي جاي ..الفجعة تخلي الراجل مرا ..

إذا بيها طلعت المرا إلي دخلت من قبيليكا ..لا في بالها ولا في دراها ..كأنوا ماصار شي .. قعد عم حمادي يسأل في روحو زعمة شنية حكايتها؟ وقرر بينو و بين نفسو باش يسأل الراجل دوب ما يخرج.. لكن عم حمادي خرج والراجل إلي دخل مسلسل في المانوت مازال ما خرجش وعم الطيب ماهوش لاهي بالحكايات هذي ..

في اللحظة هذي، ولد بنتو أهملو من تونس بكلها ..

إنشالاه الخير سألو عم التهامي ؟ لا، لباس جاوبوا عم حمادي.. أما لازمنا نخطفو أرواحنا لبوشوشة واتاو نحكيلكم في الثنية..

يتبع كان حب سائق التاكسي