mercredi 10 mars 2010

عندو ما يقلك :سخافة و إستبلاه للمشاهد

لست من هواة تونس 7 لكن ماا نعرفش شنوة شدني (أي رغبة مازوشية ) في البرنامج التلفزي: عندو ما يقلك !

نحب نحكي أولا على سخافة المذيع أولا المخنان إلي أهم حاجة بالنسبة ليه هو نجاحو هو (نحط سطر تحت هو ) في إقناع الشخص بفتح الستار.. أما عواقب ذلك فليست من مشمولاتو ..

البارح مرا زوالية يحب يقنعها بالسيف باش تقبل دعوة راجلها بالرجوع إلى البيت .

المرا قعدت تفسرلو ما ناقصها كان صبورة وصبع طباشير فماشي ما يستوعب الكلام إلي قالتو ..شي النافع ربي ..باقي سي المخنان شادد صحيح في انو المسامح كريم (العبارة الوحيدة إلي حافظها)

السيد إلي يحب سي المخنان ترجعلو هاو سي. في . متاعو :

كسرلها سنة

يضرب فيها بالبونية لين كلاويها تضروا

حشاها في وسط بنك لوح و كتفها هي ولدها ودخل عليها بالضرب

بدنها أزرق من الضرب

طيح عليها عرصة حديد

السيد مريض بالاعصاب ويخاذ في دواء

السيد هذا إلي المكان طبيعي متاعو هو مستشفى الأمراض العقلية يحب سي المخنان ويصر أنها ترجعلو وترقد معاه في نفس الفرش !!!

أنا أتسائل لو كان قبلت المرا ورجعت معاه وفقد المريض أعصابو (كيف كل مرة) و قتلها شكون المسؤول؟

هذا من شيرة من شيرة أخرى نوعية هذه البرامج التي تبحث عن عطف المتفرج إلي يتفرج ودميعاتو هابطة على خاطر في نهاية الأمر يجد نفسه فيما يعرض من مشاكل إجتماعية ويتعاطف تلقائيا مع الطرف الضعيف (ولو انو في الحقيقة هو يتعاطف مع رحو أولا لكن هذا موضوع طويل) ..قلت أن مثل هذه البرامج التي تعتمد "الفوايوريزم " لا تضيف إلى المتفرج أي قيمة إضافية بل بالعكس تبلد الفكر وتجمد التفكير وتقتل العقل وتضع الحواجز لكي لا نذهب ونفتش عن الأسباب الحقيقية لمثل هذه المشاكل الأجتماعية .. لا يمكن حل القضايا الاجتماعية وما أكثرها بالخلطة السحرية : المسامح كريم ولا بد أن ننسى ! هذا إستبلاه للعقول وتبسيط لمشاكل المجتمع الحقيقية

أما الرابح الوحيد من كل هذه المسخرة هي شركات الاشهار ورؤوس الأموال الذين يحولون دموع المشاهد إلى دنانير تضاف إلى حسابهم البنكي

5 commentaires:

عمشة في بلاد العميان كحلة لنظار a dit…

Ce type est dangereux, pour lui c normal de tabasser une femme, ce qui est plus dangereux c'est qu'il a un espace public où il exprime ses idées de merde, si j'étais avocate je le trainerai en justice. les associations féminines devraient vraiment le dénoncer.

ART.ticuler a dit…

@3amcha
أكثر حاجة مخطرة فيه هو اللامنطوق في خطابو ..والرسائل المبطنة وهي أن المرا من غير راجل ما تنجمش تعيش: .."نظرة المجتمع ليها.." "وفي أخر الأمر ما ليها كان راجلها وبيتها .." إلى غير ذلك من التعابير السخيفة ..اقترح، على غرار الحملات على عمار ،تنظيم حملة: اطلقوا سراح العقل من سجون رأس المال! شكرا على المرور

الحلزون a dit…

لو كان المرا رجعت لراجلها و كلات طريحة نبّاش القبور من بعد، تستاهل و ربّي يزيدها؛ باش تتعلّم تشارك في برامج كيف هكا و تنشر حياتها الخاصّة في التّلفزة

Hamadi a dit…

Aujourd'hui, le consommateur est passif et ne réfléchit, on joue sur le sensationnel. Et c'est payant.
Le capital (les annonceurs) cherche une rentabilité et il l'a trouve dans le voyeurisme ou dans le foot. Les autres domaines ne font pas recette, avez-vous jamais entendu parler d'un programme culturel suivi par les tunisiens depuis bouillon de culture de Bernard Pivot? Moi, non. Les essais de Chouchane de faire une copie de bouillon de culture s'est soldé par un échec parce que il a voulu parler un langage trop compliqué pour un public paresseux.

ART.ticuler a dit…

شكرا حمادي على المرور ..اتفق معك فيما قلت ماعدى أن شوشان كان يتحدث لغة "صعيبة" المشكل هو الجمهور و ليس الثقافة بنسبة 99%

Enregistrer un commentaire