بورطابل سي عبد الواسطقومني سطل ماء بارد تصب فوق مني..لكن مازلت نشوف في الدنيا كحلة و وجيعة في كامل بدني.. ونسمع في صوت جاي من قاع بير:
-هاو مزال يتنفس...
كركروني زوز وطيشوني فوق كرسي مصدد وبديت نحل في عيني و نفهم أنا فين... أنبوبة تدحرج من السقف.. أثار دم على الحيط ..وصورة ضبابية لزوز عزرا لابسين بالاكحل يسألو في نفس السؤال :
- شنوة علاقة بيهم؟؟
-علاقة شكون بشكون؟؟ على شنوة تحكيو..
واحد فيهم قال :
- زيد ترهدن وأعمل روحك خاطيك..والآخر كان يغزرلي ويضحك و يلعب بكلاب في يدو..
-باش تقر (ثلاثة نقاط فوق القاف :-) بكل شي وإلا ؟
قلتلهم أنا مستعد نقول كل شيء بما أني ماني عامل شيء ضد القانون.. لكن قولولي شنوة الموضوع ؟
جبد بورطابل أكحل من أول الموديلات وبدا يضغط على الأزرار لين وصل لحاجة خلات عينيه تتحل ورمالي البورطابل على الطاولة وقالي موش نمروك هذا؟
حاولت نقرا النومرو بعين محلولة وعين مدمومة وقتلو :إي متاعي..
كلمة متاعي خلاتهم يستقيموا الزوز في وقفتهم و غزرو لبعضهم وتبسموا..
قالولي البورتابل هذا متع صاحبك سي عبد الواسط وننصحوك تقول على كل شيء.. فماش ما تجيك العقوبة خفيفة..
قلت: لكن هذا النمرو القديم متاعي قبل ما نعمل نمرو جديد مع تونزيانا..وزيد عبد الواسط عندي سنين ربي ما شفتوش..
واحد منهم قالي:
عاود،عاود اش قلت؟سنين ربي؟ ربي؟ ملا تصلي إنت؟
قتلو:ياولدي آش من صلاة.. هذيكة طريقة متع تعبير.. وإلا تطلعش لغتنا بكلها متخونجة وأنا ما في باليش؟
يتبع
4 commentaires:
شنوة توّة سيك عبد الواسط عمل ركعتين ردّيتوه خوانجي، سيبو الراجل خليوه متهني على روحو، حاصيلو يقوى عليكم ربّي
:))
مازلنا منعرفوش هذا اتاو يطلع في التحقيق.. ههههة
و إنت كيف كلفطوك صاحبتك قعدت وحدها؟؟
المليح يبطى يا سفيان ..اتاو اجيك الحديث :-)
Enregistrer un commentaire